Қазақстан құрамасы шетелдіктерді қалай шаң қаптырды?

VI Дүниежүзілік көшпенділер ойындары нағыз қызған шағына жетті. Әлемнің 113 мемлекетінен жиналған үш мыңға жуық саңлақ бақ сынаған жарыстың үшінші күні Қазақстан құрамасы үшін өте табысты болды. Отандастарымыз қоржынға 12 алтын, 7 күміс және 5 қола жүлде салып, жанкүйерлерге керемет көңіл-күй сыйлады.

Ерік-жігер мен мығым қайратты талап ететін аударыспақ бәсекесінде қазақ жігіттері намысты қолдан бермеді. Жүз келі салмақта ел намысын қорғаған әлем чемпионы Сырым Ізбасаров қырғыз балуанын айқын басымдықпен тізе бүктіріп, осы доданың үш дүркін жеңімпазы атанды. Тоқсан келі салмақтағы Дарын Өткелбай қарсыластарына еш мүмкіндік қалдырмай, алтыннан алқа тақса, аса ауыр салмақта белдескен Нұржан Еркінұлы қола жүлдені қанағат тұтты.

Аспан серілерін баптаған құсбегілеріміз де жүлдесіз қалған жоқ. Ұлттық құрама сапындағы тоғыз спортшының төртеуі жеңіс тұғырынан көрінді. Қаршығасын баптаған Серікболсын Жалғасұлы «Жебе» атты құсымен топ жарып, алтын медальді иеленді. «Алғыр» атты қыранын самғатқан Арман Қошқаров пен «Ұшқыр» атты ителгісін ұшырған Бақдәулет Бабажан күміс жүлдегер атанса, тағы бір ителгі баптаушы Ерлан Кенжетаев «Ақбалық» есімді құсымен қолаға қол жеткізді.

Көшпенділердің дәстүрлі күрес түрлері де көрермен делебесін қоздырды. Самбо бозкілемінде аса ауыр салмақтағы Болат Сапар алтынды қанжығасына байласа, Еркебұлан Нығметов пен Жандос Бейсенбаев қола жүлдені еншіледі. Ал қырғыз күресінен ақтық сынға дейін сүрінбей жеткен Алмас Жұмағали финалда айыр қалпақты ағайындардың балуанына есе жіберіп, күміспен күмкерілді. Жанкүйерлердің ерекше қошеметіне бөленген арқан тартыс шеберлері де жарады. Кеше ғана сегіз адамдық форматта қырғыз құрамасын қапы қалдырған жігіттеріміз, бүгін төрт адамдық бағдарлама бойынша ирандық спортшылардың мысын басып, кезекті алтынды қоржынға салды.

Білек күшін сынайтын қол күресінен ұлттық құрама нағыз сенсация жасап, 7 алтын, 4 күміс, 1 қола медальді сыпырып алды. Нұрдәулет Айдархан, Медет Құттымұратов және Малена Сыдықжан оң қолмен де, сол қолмен де қарсылас шақ келтірмей екі-екіден алтын алса, Данил Устинов сол қолмен күресуден чемпион атанды.

Төртінші қыркүйекте спортшыларымыз көкпар, бәйге түрлері, қазақ күресі, тоғызқұмалақ және тазы жарысы секілді 21 спорт түрінен жүлдеге таласады. Бұл күні де спортшыларымыздан тың серпіліс пен жаңа жеңістер күтеміз.