Астанадағы «Ай толысқан түн»: Қытайдың Күз мерекесі қалай өтті?

16 қыркүйекте Астана қаласындағы «Beijing Palace Soluxe» қонақүйінде Қытайдың дәстүрлі Күз ортасы мерекесіне (Чжунцюцзе) орай салтанатты шара өтті. ҚХР-дың Қазақстандағы Елшілігі ұйымдастырған жиынға дипломатиялық корпус өкілдері, қытайлық кәсіпорындардың қызметкерлері және бұқаралық ақпарат құралдары қатысты. Шараның ашылуында ҚХР-дың Қазақстандағы Төтенше және Өкілетті Елшісі Хань Чуньлинь сөз сөйлеп, бұл мереке қытай халқы үшін отбасылық құндылықтар мен татулықтың көрінісі екенін атап өтті.

Дипломат өз сөзінде екіжақты қарым-қатынастардың қазіргі жағдайына тоқталып, Қытай мен Қазақстан арасындағы стратегиялық әріптестіктің жоғары деңгейін атап көрсетті. Оның мәліметінше, биылғы жылдың бірінші жартыжылдығында Қытайдың ішкі жалпы өнімі 4,7 пайызға өссе, Қазақстан экономикасы да тұрақты даму көрсеткіштерін байқатуда. Ресми бөлімнен кейін қатысушыларға арнайы мәдени бағдарлама ұсынылды. Шара барысында қазақ және қытай тілдеріндегі өнер туындылары орындалды. Атап айтқанда, Қазақстан Мемлекеттік би академиясы мен «Шуақ» жастар тобы ұлттық билерді сахналаса, домбырашы Ержан Әлімбетов «Адай» күйін орындады. Сонымен қатар қандастардан құралған «Қасиетті жер» тобы мен Еуразия ұлттық университеті жанындағы Конфуций институтының өкілдері арнайы дайындалған қойылымдарын ұсынды. Кеш соңында қонақтарға мерекелік дастарқан жайылып, бейресми жағдайда пікір алмасу мүмкіндігі жасалды.

Ұйымдастырушылардың айтуынша, мұндай шаралар екі ел арасындағы мәдени-гуманитарлық байланыстарды одан әрі нығайтуға ықпал етеді.