Қазақстан Қарулы күштерінде «Voenmart» пилоттық жобасы іске қосылды

Қазақстан Қарулы күштерінде сарбаздардың тұрмыстық жағдайын заманауи талаптарға сай бейімдеу бағытында тың жоба қолға алынды. Ендігі кезекте мерзімді қызметтегі әскери қызметшілерге күнделікті қажетті тауарлар мен ыстық тағамдарды тікелей әскери бөлім аумағына алдыру мүмкіндігі туып отыр. Бұл мақсатта ҚР Қарулы күштерінің Тыл бастығы басқармасы «Voenmart» пилоттық жобасын ресми түрде іске қосты.

Жаңа жүйе әзірге бірнеше стратегиялық нүктеде сынақтан өтуде. Атап айтқанда, Алматы облысында орналасқан 78460 әскери бөлімі, Гвардейск гарнизонының оқу орталығы, елордадағы 68665 әскери бөлімі және Сағадат Нұрмағамбетов атындағы әскери колледж сарбаздары алғашқылардың бірі болып цифрлық дүкеннің игілігін көріп жатыр. Ол үшін аталған мекемелерге жеткізуші тарапынан тегін терминалдар мен арнайы планшеттер орнатылған. Жоспар бойынша бұл құрылғылар алдағы уақытта әскери бөлімдердің теңгеріміне толықтай өтпек.

ҚР Қорғаныс министрлігі Ақпараттық технологиялар департаменті бастығының орынбасары, подполковник Алмат Махановтың сөзінше, «Voenmart» – әскери тұрмысты ұйымдастырудың жаңа деңгейі. Цифрлық форматтың арқасында әскери қызметшілер қажетті тауарларға ыңғайлы әрі жедел қол жеткізе алады. Бұл өз кезегінде әскери қызмет жағдайын жайлы етіп қана қоймай, заманауи талаптарға толықтай сәйкестендіруге жол ашады.

Дәстүрлі әскери сауда нүктелерімен салыстырғанда, жаңа платформаның мүмкіндіктері әлдеқайда ауқымды. Сарбаздар жеке гигиена құралдары мен тігін бұйымдарынан бөлек, жаңа піскен жемістер, түрлі шырындар мен нан өнімдеріне еш кедергісіз тапсырыс бере алады. Жобаның ең басты ерекшелігі – ыстық тамақ жеткізу қызметі. Енді сарбаздар бәліш, бургер немесе пицца секілді тағамдарды суытпай, тікелей ыстық күйінде алдыра алатын болды.

Ең маңыздысы – жеткізу қызметі толықтай тегін. Әскери қызметшілер ешқандай қосымша комиссиясыз немесе қызмет ақысынсыз тек тауардың нақты құнын ғана төлейді. Сонымен қатар, жеткізілетін өнімдердің сапасы көп деңгейлі тексеруден өтетіндіктен, қауіпсіздікке де баса мән берілген. Тапсырыстарды есепке алу мен бақылаудың ашық жүйесі процесті толықтай қадағалауға мүмкіндік береді.

Қазіргі уақытта пилоттық жобаның тиімділігі жіті бағалануда. Егер сынақ мерзімі сәтті аяқталса, «Voenmart» жүйесі Қазақстан Қарулы күштерінің басқа да әскери бөлімдеріне кезең-кезеңімен енгізілетін болады. Бұл армиядағы тұрмыстық қызмет көрсету сапасын жаңа белеске шығаратыны сөзсіз.