Қазақ мультфильмі Сианьдағы фестивальде топ жарды

Қазақстандық 3D форматындағы «ADAM: Нәртәуекел» толықметражды анимациялық туындысы Қытайда өтіп жатқан беделді кинофестивальдің финалына жолдама алды. Режиссер Жәнібек Нұрбекұлының бұл еңбегі Сиань қаласындағы XIII Халықаралық Жібек жолы кинофестивалінде үздік он бес фильмнің қатарына еніп, отандық анимация тарихындағы маңызды жетістікке айналып отыр.

Биыл фестиваль аясында алғаш рет балаларға арналған «Жібек жолы балаларының бірге сапары · Балалар кино маусымы» атты арнайы бөлім ашылды. Ондағы басты мақсат — осы тарихи аймақтағы елдер балаларының мәдени байланысын нығайтып, балалар киносының дамуына серпін беру. Байқауға түрлі мемлекеттерден жалпы саны алпыс бір балалар фильмі ұсынылды. Он бес академиялық сарапшыдан құралған қазылар алқасы үміткерлерді іріктеу кезінде оқиғаның балалар ұғымына сай әрі шынайы берілуіне, сюжеттің әсерлілігіне, мәдени ерекшеліктердің көрініс табуы мен көркемдік деңгейіне, сондай-ақ жаңашылдығына ерекше назар аударды.

Осындай қатаң іріктеуден сүрінбей өткен он бес туынды ғана ақтық сынға жол тартты. Енді қазақстандық мультфильм халықаралық доданың басты жүлдесі үшін соңғы кезеңде бақ сынайтын болады. Жеңімпаздар мен арнайы марапат иелері жиырма үшінші қыркүйек күні өтетін финалдық қазылар алқасының шешімімен белгілі болып, салтанатты марапаттау рәсімі де дәл сол күні өтеді.