«Гарантиядағы» көлік: дилерлік орталықта май ауыстыру міндетті емес

Біз де салоннан көлік алып мінген көп адамның біріміз. Сізді білмеймін, екі жыл болды, өзім дилерлік орталықтың талабынан шыға алмай келдім. 5 мың, 10 мың, 20 мың шақырым жүрген сайын май/фильтр ауыстыруға міндеттісің.

Осы аралықта дилерлік орталыққа барған әр «визитім» кемінде 70 мың теңгеге шығатын. Енді «пробег» 30 мыңға жетті. Орталыққа шығып сұрасам, ол қызметтің құны қазір 92 мың теңге (!) болыпты.

Май ауыстыру міндетіңе адал болсаң, қалтаңнан 100 мың теңге ойланбай шығайын деп тұр. Ал майды басқа жерде ауыстырсаң, «көлігің гарантиядан шығады-мыс». Бізді әбден қорқытып тастаған ғой...

Екі-үш апта бұрын басқа оператормен сөйлескенмін. Ол да: «Жо-жоқ, май мен май фильтрін біздің орталықта ауыстыру керек» деп табандап тұрып алды. «Өзіммен бірге қай деталін әкеле аламын» десем, «тек салон фильтрі мен «воздушный» фильтрді әкеле аласыз» дейді. Соның өзінде 92 мыңның қызметі 76 мыңға ғана түседі екен.

Бүгін басқа оператормен сөйлестім. Сол жерде турасын айтуға тура келді: «Інім, жасырып қайтейін, аспандағы ақшаны сұрап тұрсыздар, бұның бір басқа жолы болуы керек қой?!.»

Сонда білгенім, расында да дилерлік орталыққа байланып қалмай, басқа сервисте май ауыстыруға болады екен. Тек үш талап қойды, сервис:

1) атқарылған жұмысты растайтын акт қағазын беруі шарт;
2) құятын майға сертификат ұсынуы шарт (нақты екі май түрін атады)
3) көліктің сервистік кітапшасына мөрін басуы шарт.

Осы үшеуі орындалатын болса ғана басқа жерде май ауыстыруға рұқсат-мыс.

Оқырман арасында да өзім сияқты кісілер көп боларын сезіп отырмын. Өзім бүгін білген дүниені көпшілікке айта отырайын деп шештім. Дилерлік орталыққа «мақұл» дей берсең, 100 мыңнан шашылу керек. Ол кім-кімге де оңай емес.

Дерек пен мәтін ҚАРЖЫЛЫҚ САУАТ арнасынан алынды