Электромобильдерге жасыл нөмір беріледі

Көшеде үнсіз сырғып бара жатқан электромобильдер енді жалпы ағыннан алыстан менмұндалап тұратын болады. Өйткені Сенат көлік саласындағы жаңа технологияларды реттейтін заң жобасын бірінші оқылымда мақұлдады. Басты жаңалық – электрокар иелеріне арнайы мемлекеттік нөмір беріледі. Алдын ала мәліметке сүйенсек, экологиялық тазалықтың символы ретінде оның түсі жасыл болуы әбден мүмкін.

Бірақ «электромобилім бар еді» деп ХҚКО-ға (АвтоЦОН) қарай тұра жүгірудің қажеті жоқ. Заң осы жазда қабылданғанымен, жаңа нөмірлерді бірден қолға ұстатпайды. Ішкі істер министрінің орынбасары Санжар Әділовтің айтуынша, алдымен алты айлық өтпелі кезең болады. Бұл инновацияның ең қуантарлық тұсы – оған мемлекет бюджетінен бір тиын да артық шығын кетпейді. Өйткені темір сол қалпы қалады, тек бояудың түсі өзгереді. Қарапайым әрі тиімді шешім.

Дегенмен, заң жобасы тек нөмірді бояумен шектелмейді. Көлік жүргізушілерінің жүйкесін жұқартатын электросамокаттар мен шағын электр көліктерінің жолға шығуына нақты шектеу қойылмақ. Сонымен қатар, фантастикалық фильмдердегідей жүргізушісіз басқарылатын көліктердің де қозғалысы заңмен реттеледі. Болашақ келді деген осы.

Ал енді ең қатаң жаңалыққа келсек: егер рөлге мас күйде отырып ұсталсаңыз, көлік жүргізуді ұзақ уақытқа ұмытуға тура келеді. Заң бұзғандарды жүргізуші куәлігінен 7-8 жылға дейін айыруды ұсынып отыр.

Ішкі істер министрлігінің тағы бір жаңалығы – сүйікті немесе қымбатқа алған мемлекеттік нөміріңізді енді жақын туыстарыңызға мұраға қалдыра аласыз. Яғни, әдемі нөмірлер енді отбасылық жәдігерге айналуы әбден мүмкін.