Егінді қорғаудың жаңа стандарттары қалай жұмыс істейді?

Қазақстанның өңірлерінде шегірткеге қарсы химиялық дәрілеу жұмыстары қарқынды жалғасып жатыр дейді - ҚР Ауыл шаруашылығы министрлігі.

. 9 шілдедегі мәліметке сүйенсек, биылға жоспарланған 2,2 миллион гектар алқаптың 1,7 миллион гектары, яғни 76,2 пайызы толықтай өңделді. Егін алқаптарын зиянкестерден қорғау шаралары бекітілген жоспарға сай жүзеге асып, барлық қажетті жұмыстар уақтылы әрі толық көлемде орындалып жатыр.

Жауапты науқанның барысын тікелей қадағалау мақсатында Агроөнеркәсіптік кешендегі мемлекеттік инспекция комитетінің басшылығы қазіргі уақытта Қарағанды, Алматы және Жетісу облыстарында арнайы жұмыс сапарымен жүр. Олар аумақтық инспекция басшыларымен бірлесіп, химиялық өңдеуден өткен алқаптардың сапасына тексеру жүргізді.

Биыл жалпы көлемі 2,2 миллион гектар жерді дәрілеу жоспарланған. Бұл көрсеткіш 2024 жылмен салыстырғанда 30 пайызға аз. Мұндай оң нәтижеге Үкіметтің қолдауымен атқарылған кешенді жұмыстардың және өсімдіктерді қорғау жүйесін жетілдіру бағытында дер кезінде қабылданған шаралардың арқасында қол жеткізіліп отыр.

Атап айтқанда, саладағы маңызды өзгерістердің бірі – қызметтерді сатып алудың бірыңғай жүйесінің енгізілуі. Бұл қадам сатып алу процестерін бір орталықтан басқаруға және мемлекеттік бюджет қаражатының барынша ұтымды әрі тиімді жұмсалуын қамтамасыз етуге жол ашты.

Сонымен қатар, дәрі шашатын техникалардың (желдеткіш бүріккіштердің) бір тәулікке шаққандағы жұмыс өнімділігі қайта қаралып, бір техниканың өңдеу көлемі 100 гектардан 70 гектарға дейін төмендетілді. Бұл шешім жұмыс сапасын арттыруға мүмкіндік берді. Нәтижесінде далаға шыққан техника саны 556 бірлікке жетіп, 2025 жылмен салыстырғанда 25 пайызға артты.

Оған қоса, фитосанитариялық қызметтің материалдық-техникалық базасы айтарлықтай жаңарды. Биыл сала мамандарына арналып 103 ұшқышсыз ұшу аппараты (дрон) сатып алынды. Оның ішінде 57 дрон егістіктерді барлап-зерттеуге бөлінсе, қалған 46 аппарат тікелей химиялық дәрі шашу жұмыстарына жұмылдырылған.

Зиянкестерге қарсы күрестің тиімділігін арттыру және ақпарат алмасуды жылдамдату мақсатында арнайы «FITOCENTRE» ақпараттық жүйесі іске қосылды. Бұдан бөлек, Біріккен Ұлттар Ұйымының Азық-түлік және ауыл шаруашылығы ұйымымен (ФАО) бірлескен ауқымды серіктестік жоба жүзеге асырылуда. Бұл жоба ауыл шаруашылығына цифрлық технологияларды, жасанды интеллектіні және дрондарды кеңінен енгізуге бағытталған.

Қазіргі таңда барлық өңірлерде құрылған жедел штабтар қалыпты режимде, тұрақты түрде жұмыс істеп тұр.