Денеге жанаспай-ақ эмоцияны сезетін чип: Apple тағы қандай жаңалық дайындап жатыр?

Еуропалық Одақ құжаттарына сәйкес, технологиялық алпауыт Sonera деп аталатын компанияны сатып алды. Аталған ұйым болашақтан келгендей әсер қалдыратын, адам миының белсенділігін магниттік өрістер арқылы оқитын киілетін құрылғылар жасаумен айналысады.

Купертинолық корпорация өз келісімдерін жиі құпия ұстайды. Дегенмен, Еуропалық Одақтың «Цифрлық нарықтар туралы» актісіне сәйкес, ірі коммерциялық операциялар міндетті түрде жария етілуі тиіс. ЕО ресми сайтындағы жаңа мәліметтерге сүйенсек, Sonera арнайы магниттік сенсорлы чиптер жасап шығаруға машықтанған.

2023 жылы жарық көрген баспасөз баянына назар аударсақ, компания дәстүрлі электрлік өлшеу әдістерінен бас тартып, адам ағзасынан бөлінетін магниттік өрістерді қауіпсіз жолмен анықтайтын жаңа сенсорлық жүйе ойлап тапқан. Мұндай инновация ми белсенділігін кәдімгі жүрек соғысы немесе дене қызуы сияқты өте оңай өлшеуге мүмкіндік береді. Нәтижесінде адамның қозғалысы, денсаулығы, ішкі эмоциялары мен ойлары туралы нақты деректер жинауға жол ашылады.

MacRumors басылымы тапқан мәліметте бұлшықет белсенділігіне негізделген S1 чипі туралы айтылады. Жаңа чип тұтынушыларға арналған киілетін құрылғылардың мүлдем жаңа буынын жасауға негіз болмақ. Ерекше тәсіл нейрондық белсенділіктен туындайтын электрлік токтардың магниттік өрістерін дәл өлшейді. Ең бастысы — құрылғының теріге тікелей тиіп тұруы қажет емес.

Sonera соңғы жылдары қандай нақты жетістіктерге жеткені әзірге белгісіз. Алайда, Apple мамандары аталған технологиядан үлкен әлеует байқағаны анық. Магниттік өрістерді өлшеу арқылы мидың жұмысын оқу ғылыми-фантастикалық сериалдардың сюжетіне ұқсайды. Смарт сағаттар мен жасанды интеллект бағытын белсенді дамытып жатқан корпорация үшін мұндай қадамның берері мол.