ChatGPT чаттарын бөгде адамдардан қалай жасыруға болады?

Көпшілігіміз ChatGPT-ді жеке психолог, ең жақын дос немесе жұмыс көмекшісі ретінде көріп, ең құпия ойларымыз бен маңызды құжаттарымызды ойланбастан бөлісе береміз. Алайда ол сөздер тек алгоритмнің жадында қалады деп ойласаңыз, қатты қателесесіз.

404 Media басылымының зерттеуіне сүйенсек, OpenAI компаниясы нақты қолданушылардың сұраныстары мен толық диалогтарын оқу үшін жүздеген адамды жұмысқа жалдаған. Олардың басты міндеті — жүйенің қателіктерін түзетіп, жауаптарды саралау. Anthropic компаниясы да дәл осы тәсілді қолданатынын растады.

Уайымдамаңыз, бұл біреу сіздің барлық хат-хабарларыңызды күні-түні аңдып отыр деген сөз емес. Тексерушілерге сіздің аты-жөніңіз көрсетілмейді, әрі компания жеке мәліметтерді автоматты түрде өшіруге тырысады. Дегенмен, компанияның өзі өте құпия деректердің сүзгіден өтіп кетуі мүмкін екенін мойындап отыр.

Яғни, түнгі үште нейрожеліге жазған ең оғаш сұрақтарыңызды немесе тексеруге жіберген компанияңыздың құпия есебін дәл қазір әлемнің бір түкпіріндегі бейтаныс маман мұқият оқып отыруы әбден мүмкін.

Құпия жазбаларды бөтен адамның көзінен қалай қорғаймыз? Ол үшін мына қадамдарды дереу жасаңыз:

1. Баптауларға (Settings) кіріңіз.

2. Деректерді басқару (Data Controls) бөлімін ашыңыз.

3. «Improve the model for everyone» (Модельді барлығы үшін жақсарту) қызметін өшіріп тастаңыз.

Ескерту: бұл баптауды өшіру сұраныстарыңыздың модельді оқытуға кетуіне тосқауыл қояды, бірақ заң талаптары мен қауіпсіздік тексерулері барысында бәрібір ерекшеліктер болуы мүмкін.

Бұл жазбаны әсіресе қызметтік құжаттарды көзді жұмып чат-ботқа жүктей салатын әріптестеріңізге жіберіп, ескертіп қойыңыз!