Білімге құйылған миллиондар: БАӘ билеушісінің үздік түлектерге жасаған тарихи сыйы

Біріккен Араб Әмірліктерінің вице-президенті, Премьер-министр және Дубай билеушісі шейх Мұхаммед бен Рашид Әл Мақтум 2025-2026 оқу жылын үздік аяқтаған 12-сынып оқушыларына нағыз тосынсый жасады, деп жазды - khaleejtimes.com

Мектеп қабырғасындағы ерен еңбегі мен жоғары академиялық жетістіктері үшін елдің ең үздік оқушыларының әрқайсысына 100 000 дирхам (12 844 600 теңге) көлемінде ақшалай сыйлық берілген.

Мемлекет басшысының бұл жомарттығы ел бойынша ең жоғары балл жинаған түлектерге деген үлкен құрметтің белгісі ретінде сенбі күні жарияланды. Қомақты сыйақы мемлекеттік, жекеменшік мектептер мен қолданбалы технологиялар бағытында білім алған ең дарынды жастарға бұйырды.

Мемлекеттік мектептердің үздіктері:

• Элиталық бағыт: Абир Абдул Рахман Файез Хумайд Әл-Шамси (Дубай, Al Rashidiya Cycle 3 қыздар мектебі).

• Кеңейтілген бағыт: Адам Мұхаммед Авад Авад Ибрагим (Абу-Даби, Al Khatim ұлдар мектебі).

• Жалпы бағыт: Хесса Рашид Мусбех Абдул Рахман Әл-Алили (Абу-Даби, Al Mawaheb қыздар мектебі).

Жекеменшік мектептердің үздіктері:

• Кеңейтілген бағыт: Әли Асим Хассан (Шарджа, Al Noor халықаралық жекеменшік мектебі).

• Жалпы бағыт: Абдулла Ясер Абу Араби (Абу-Даби, Al Falah академиясы).

Қолданбалы технологиялар бағытының үздіктері:

• Ғылым бағыты: Рашид Ахмед Рашид Әли Әл-Данхани (Фуджайра).

• Кеңейтілген бағыт: Шейха Абдул Азиз Абдул Рахман Мұхаммед Әл-Хосани (Аджман).

• Жалпы бағыт: Мәриям Саид Хамад Әл-Хадфи Әл-Кетби (Умм әл-Қайуайн).

Күтпеген сыйлық оқушылар мен олардың отбасыларына зор қуаныш сыйлады. Бұл қадам – БАӘ басшылығының білім саласына деген тұрақты қолдауының және келешек ұрпақты жаңа белестерге ынталандыруының айқын көрінісі.

Осыған дейін, 11 шілде күні шейх Мұхаммед әлеуметтік желідегі парақшасында елдің ең үздік оқушыларын арнайы құттықтап, олардың табандылығына тәнті болғанын жазған еді:

"Біз ұлттық деңгейде жалпы орта білім туралы аттестатты үздік қорғап шыққан ұл-қыздарымызды шын жүректен құттықтаймыз! Баршаңызбен мақтанамыз және Әмірліктердің жарқын болашағын құруға үлес қосатындарыңызға сенімдіміз. Біздің еліміз тұлғаны дамыту үшін ең қолайлы ортаны жасауды жалғастыра береді. Білім – біздің ең ұлы ұлттық жобамыз, ал балаларымыз – бүгініміз бен болашағымыздың басты кепілі."

Ол сондай-ақ БАӘ жастарды заманауи біліммен, дағдылармен және құндылықтармен қаруландырып, елдің жаһандық бәсекеге қабілеттілігін арттыратын мықты білім беру жүйесін қолдауға әрқашан басымдық беретінін қадап айтты.

Желіде бұл жаңалық үлкен резонанс тудырды. Үздіктердің қатарынан табылған Абдулла Ясер Абу Арабидің ағасы Омар Абу Араби Инстаграмда шейх Мұхаммедке отбасы атынан алғысын білдірді: "Біз ұлы мәртебелі шейх Мұхаммед бен Рашид Әл Мақтумға осындай жомарттығы үшін шексіз алғыс айтамыз. Сіздің БАӘ-ні және осы елді Отаным деп санайтын әрбір адамды бірінші орынға қоятын көреген көшбасшылығыңыз бен шексіз қолдауыңыз келешек ұрпақты шабыттандыра береді," – деп жазды ол.

Ал abalobaidly есімді желі қолданушысы биылғы түлектердің қандай қиындықтардан өткенін еске салды: "Бұл буын пандемия кезінде оқыды, әлемдік қақтығыстардың куәсі болды, онлайн және офлайн оқудың арасында арпалысып жүріп, бәрібір үздік шықты. Олардың жеңісі – 12 жылдық табандылықтың және отбасы мен ұстаздардың толассыз қолдауының жемісі. Олар шын мәнінде қиындықтармен шыңдалған ұрпақ, ал олардың болашағы бұдан да жарқын болмақ."

Өз кезегінде үздік оқушы Әли Асим Хассан білім алған Шарджадағы Al Noor халықаралық мектебі де мақтанышын жасырмады: "Мектебіміз ұлттық рейтингтің шыңынан көрініп, академиялық жетістіктің туын биік ұстайтын үздік оқушыларды тәрбиелеу дәстүрін жыл сайын жалғастырып келеді."

Бұл марапат – тек қаржылық сыйлық қана емес, БАӘ-нің академиялық озаттықты ұлықтап, жастардың білімге деген құштарлығын арттыруға салған ең үлкен инвестициясының дәлелі.