Бала ақысына бұғау салынбайды: Алимент пен қарызға қатысты жаңа заң
Енді алимент төлейтін немесе алатын ата-аналардың өмірі біршама жеңілдейтін сыңайлы.
Мәжіліс атқарушылық іс жүргізуге қатысты заңға көптен күткен түзетулерді екінші оқылымда қабылдады. Енді қарызға батқан азаматтардың, әсіресе алимент төлейтін немесе алатын ата-аналардың өмірі біршама жеңілдейтін сыңайлы.
Бұрын қарызы бар жалғызбасты ананың немесе әкенің банктегі шоты бұғатталғанда, баланың алименті де қоса бұғатталып қалатын жағдайлар жиі кездесетін. Жаңа түзетулерге сәйкес, алимент алушылар қаражатты қабылдау үшін банкте арнайы бөлек шот аша алады. Ең бастысы — сот орындаушылары бұл шоттағы қаражатты бұғаттай алмайды, себебі ол ақша тек баланың қажеттілігіне жұмсалуы тиіс екені заңмен бекітіліп отыр.
Сондай-ақ, отбасылық дауларда баламен көрісу және араласу тәртібіне қатысты түсініспеушіліктерге байланысты да жақсы жаңалық бар. Бұрын осындай атқарушылық құжаты бар ата-аналар автоматты түрде Бірыңғай борышкерлер тізіліміне енгізіліп, біраз шектеулерге тап болатын. Енді бұл қатаң талап жойылып, тізілімге автоматты түрде қосу процесі алынып тасталды. Оған қоса, егер екі тарап сот арқылы бітімгершілік келісім жасауға ниет білдірсе, атқарушылық іс жүргізу бір айға дейін тоқтатыла тұруы мүмкін. Яғни, тараптарға дауласудың орнына ортақ мәмілеге келіп, татуласуға ресми уақыт беріледі.
Бұл заң тек алиментпен шектеліп қалған жоқ. Борышкерді баспанасынан мәжбүрлі түрде шығаратын болса, енді кемінде 10 күнтізбелік күн бұрын алдын ала хабарлау міндеттелді. Бұл азаматтарға көшуге дайындалуға немесе тұрғын үй мәселесін реттеуге мүмкіндік бермек. Ал айыппұлдар мен салықтық қарыздарды өндіріп алу шегі 20 АЕК-тен 40 АЕК-ке дейін ұлғайтылды.
Тағы бір назар аударарлық тұсы — интернет-платформалар мен мобильді қосымшалардың операторлары енді сот орындаушыларына борышкерлердің табысы туралы мәліметтерді беруге міндетті болады. Ал жеке сот орындаушыларының өздеріне қатаң бақылау орнатылып, олар заңды білу деңгейін тексеретін арнайы аттестаттаудан өтеді. Сондай-ақ, олардың арнайы шоттарындағы ақша қозғалысын әділет органдары сұратып, тексере алатын болды.
