Аяқ астынан ауруханаға түссеңіз, жақындарыңыз қалай біледі? eGov-тағы құтқарушы функция

Жол апаты немесе денсаулықтың күрт сыр беруі... Өмірде ешкім ештеңеден сақтандырылмаған. Егер кенеттен ауруханаға түссеңіз, жақындарыңыз бұл туралы қалай біледі? eGov порталында іске қосылған жаңа құтқарушы-сервис дәл осы мәселені шешуге арналған. Ол қалай жұмыс істейді және алаяқтардың құрығына түспеу үшін нені білу маңызды?

Қазақстанда азаматтардың қауіпсіздігін қамтамасыз ету мақсатында жаңа цифрлық қызмет іске қосылды. Енді әрбір адам төтенше жағдайда хабарланатын, өзіне ең жақын деген үш адамды алдын ала белгілеп қоя алады. Бұл қызметті пайдалану үшін таңдалған адамдардың жасы он сегізден асуы және олардың Мобильді азаматтар базасында тіркелуі міндетті. Егер сіз күтпеген жерден ауыр жағдайға ұшырап, аурухана төсегінен бірақ шықсаңыз, жүйе автоматты түрде әлгі үш адамның ұялы телефонына жедел SMS-хабарлама жібереді.

Пайдалы функцияны іске қосу өте оңай әрі ешқандай құрғақ нұсқаулықтарды қажет етпейді. Егер сіз eGov.kz порталын қолдансаңыз, жүйеге кіргеннен кейін «Денсаулық сақтау» санатына өтесіз. Сол жерден ауруханаға жатқызылған жағдайда хабарлама жіберуге арналған сенімді тұлғаларды тіркеу қызметін тауып, жақыныңыздың Жеке сәйкестендіру нөмірін (ЖСН) енгізесіз де, операцияны растайсыз. Ал eGov Mobile қосымшасын тұтынушылар үшін бұл процесс тіпті оңайлатылған: «Танымал қызметтер» бөліміне кіріп, дәл сол қадамдарды қайталау жеткілікті.

Сіз ЖСН нөмірін енгізіп, сұраныс жіберген сәтте, сенімді тұлға ретінде таңдалған адамға 1414 нөмірінен арнайы SMS келеді. Ол хабарламадағы кодты теру арқылы сіздің сұрауыңызды растай алады немесе одан бас тартуға да құқылы. Расталған жағдайда барлық ақпарат Денсаулық сақтау министрлігінің базасына жөнелтіліп, өтініш санаулы минуттарда өңделеді. Қызметтің сәтті қосылғанына көз жеткізу үшін жеке кабинеттегі статусты тексеріп қойған абзал.

Жаңа сервистің тиімділігі даусыз, әсіресе ерлі-зайыптылар немесе егде жастағы ата-анасы бар жандар үшін таптырмас көмек. Дегенмен, мұндай жаңашылдықтарды киберқылмыскерлер де өз пайдасына жаратып кетуі әбден мүмкін. Бұған дейін де 1414 нөмірін жамылған алаяқтар талай адамның жеке деректерін жымқырғаны жасырын емес. Сондықтан телефоныңызға келген кез келген хабарламадағы сілтемелерге өтпес бұрын немесе кодты растар алдында, оны нақты сіздің жақыныңыз жібергеніне көз жеткізіп, сақтық шараларын қатаң сақтаған жөн.