Астана мен Бурабайда ұлттық бірегейлік пен рухани мәдениетке арналған халықаралық конференция өтті
Астана мен Бурабайда жаһандану дәуіріндегі ұлттық бірегейлікті сақтау және рухани мәдениетті жаңғырту мәселелеріне арналған ауқымды халықаралық ғылыми конференция өтті. Екі күнге созылған алқалы жиын Қазақстан, Түркия, Әзербайжан, Өзбекстан, Қырғызстан және Польша ғалымдарының басын қосып, дәстүр мен заманауи дамудың өзара сабақтастығын талқылаған маңызды пікірталас алаңына айналды.
2026 жылдың 21-22 тамызында Л.Н. Гумилев атындағы Еуразия ұлттық университетінде «Дәстүр мен қазіргі заман диалогы: рухани мәдениет ұлттық бірегейліктің негізі ретінде» атты халықаралық ғылыми-практикалық конференция өз мәресіне жетті. Бұл алқалы жиын Қазақстан Республикасы Ғылым және жоғары білім министрлігі Ғылым комитетінің «Қазіргі заманғы ұлттық бірегейлікті қалыптастырудағы халық шығармашылығының әлеуметтік рөлін зерттеу: рухани мәдениетті модификациялау және қайта құру» бағдарламасы аясында ұйымдастырылды.
Конференцияның пленарлық мәжілісінде аталған жоба жетекшісі, тарих ғылымдарының кандидаты, қауымдастырылған профессор Теңгеш Қаленова сөз сөйлеп, 2025-2026 жылдар аралығында атқарылған ауқымды жұмыстар мен маңызды ғылыми нәтижелерді көпшілік назарына ұсынды.
Халықаралық басқосуға Қазақстаннан бөлек Түркия, Әзербайжан, Өзбекстан, Қырғызстан және Польша елдерінен арнайы келген белгілі зерттеушілер қатысты. Атап айтқанда, ғылыми пікірталас алаңында Түркиядағы Қажы Байрам Вели университетінің профессоры Алпер Алып, Әзербайжан Ұлттық Ғылым академиясының А.А. Бакиханов атындағы Тарих және этнология институтының бөлім меңгерушісі, профессор Ильхама Маммадова, Өзбекстандағы Әлішер Науаи атындағы Өзбек тілі мен әдебиеті университетінің кафедра меңгерушісі Камолахон Абдуразакова, Жүсіп Баласағын атындағы Қырғыз ұлттық университетінің профессоры Гульмира Карабалаева, сондай-ақ Варшава университеті Шығыс зерттеулері кафедрасының меңгерушісі, профессор Анджей Вежбицки сынды танымал ғалымдар баяндама жасады.
Мәртебелі қонақтар ұлт-азаттық күрестің ұлттық бірегейлікті қалыптастырудағы рөлі, дәстүрлі мәдениет пен әлеуметтік рәсімдердің маңызы, жаһандану дәуіріндегі рухани құндылықтарды сақтау жолдары мен заманауи өзгерістердің ұлт болмысына ықпалы жөнінде сүбелі ойларын ортаға салды.
Алқалы жиынның алғашқы күні елордада басталса, екінші күні шара Бурабайдың көркем табиғаты аясында жалғасты. Ондағы «Nomadius» этнографиялық мұражайында «Қазақстандық бірегейлік мәдениетаралық диалогтың негізі ретінде: әлеуметтік-мәдени тәсілдер теориясы мен практикасы» тақырыбында арнайы дөңгелек үстел өтті.
Бұдан бөлек, конференция аясында тарих ғылымдарының докторы, ЕҰУ профессоры Жамбыл Артықбаевтың «Қазақ халқының салтанатты-ғұрыптық мәдениеті» атты жаңа оқу құралының тұсаукесері өтіп, ғылыми қауым мазмұнды еңбекпен танысты.
Пікірлер
Әзірге пікір жоқ. Алғашқы пікірді қалдырыңыз!
