Алгоритмдер әйелдерді ығыстыра бастады: Технология дамыған сайын гендерлік теңсіздік неге ушығып барады?
Ерлер цифрлық жүйені жасап жатыр, ал әйелдер күнделікті жұмысынан айырылып жатыр: Технология заманындағы теңсіздік неге тереңдей түсті және ертең кеш болып қалмас үшін не істеу керек?
Жасанды интеллекттің (ЖИ) дамуы еңбек нарығындағы гендерлік теңдікке қалай әсер етеді? Халықаралық еңбек ұйымының (ХЕҰ) 84 елдің деректерін қамтитын жаңа зерттеуі осы сауалға нақты жауап ұсынды. Зерттеу нәтижесі көрсеткендей, жаңа технологиялардың ықпалы гендерлік тұрғыдан бейтарап емес: нейрожелілер ең алдымен әйелдердің жұмысына қауіп төндіріп тұр.
БҰҰ есебіне сүйенсек, жасанды интеллект пен автоматтандырудың ықпалына ұшырау қаупі бар мамандықтардың басым бөлігі әйелдерге тиесілі. Нақтырақ айтсақ, әйелдер басымдыққа ие кәсіптердің 29 пайызы ЖИ әсеріне ұшырауы мүмкін болса, ерлерге тән мамандықтарда көрсеткіш небәрі 16 пайызды құрайды.
Айырмашылықтың басты себебі – әйелдердің көбінесе автоматтандыруға оңай берілетін қайталанбалы жұмыстарда, яғни іс қағаздарын жүргізу, әкімшілік және бизнесті қолдау (кеңсе) салаларында шоғырлануында. Ал жасанды интеллектке қатысты жаңа мамандықтарда әйелдердің үлесі әлі де өте төмен. Салдарынан жаңа технологиялық мүмкіндіктерді пайдаланудан шеттеп қана қоймай, технологиялардың қалай жасалып, қалай қолданылатынына да ықпал ете алмай отыр.
Дегенмен, ХЕҰ сарапшылары жаппай жұмыссыздық болмайды деп отыр. Жасанды интеллект мамандықтарды толығымен жойып жіберуден гөрі, күнделікті міндеттерді, еңбек жағдайы мен талап ететін дағдыларды айтарлықтай өзгертеді.
Болашақта технологиялық даму еңбек нарығына әділ әсер етуі үшін бүгіннен бастап нақты қадам жасалуы тиіс. Ол үшін әлеуметтік диалогты күшейту, мамандықтардың ер немесе әйел жұмысы деп бөлінуін (кәсіби сегрегация) жою және ЖИ саласындағы әйелдердің үлесін арттыру аса маңызды.
Қысқаша айтқанда: технологиялар жаңа болғанымен, теңсіздік ескі күйінде қалып отыр.
Пікірлер
Әзірге пікір жоқ. Алғашқы пікірді қалдырыңыз!
