Алғашқы кибер-офицерлер ант қабылдады

Цифрлық әлемдегі қауіп-қатер күн санап артып келе жатқан шақта, еліміздің қорғаныс саласы да жаңа белеске көтерілді деп хабарлады - Қазақстан Республикасы Қорғаныс министрлігінің ресми сайты.

Радиоэлектроника және байланыс әскери-инженерлік институтында 170-тен астам запастағы офицер мен сержант оқуын сәтті аяқтап, Отан алдында салтанатты түрде әскери ант қабылдады.

Бұл іс-шараның басты жаңалығы – Қарулы күштер тарихында алғаш рет «Киберқауіпсіздік» мамандығы бойынша офицерлердің түлеп ұшуы. Сонымен қатар, «Байланыс» саласы бойынша да запастағы сержанттар тобы арнайы дайындықтан өтті.

Ерекшелігі сол, жоғары оқу орындарының студенттері әскери даярлықты негізгі оқу кестесінен қол үзбей жүріп алып шықты. Олар тек құрғақ теориямен шектеліп қалмай, нақты әскери оқу-жаттығуларға қатысып, тәжірибе жинады. Мәселен, киберқауіпсіздік мамандары ақпараттық жүйелерді бұзуға бағытталған хакерлік шабуылдарға қарсы тұруды үйренсе, байланысшылар ең заманауи техниканы ұрыс даласында орналастырып, қолданудың қыр-сырын меңгерді.

Институттың академиялық ұтқырлық бөлімінің әдіскері, майор Жанарбек Керімқұловтың айтуынша, қазіргі Қарулы күштер жоғары технологиялық ортада еркін жұмыс істей алатын мамандарға қатты мұқтаж:

«Сондықтан біз запастағы офицерлер мен сержанттарды даярлау кезінде теориялық біліммен қатар, олардың нақты жағдайда орындайтын міндеттерін тәжірибеде пысықтауға ерекше көңіл бөлдік. Цифрлық технологиялар қарыштап дамыған заманда бұл бағыттар өте сұранысқа ие», – дейді ол.

Ал жаңа мамандықтың алғашқы түлектерінің бірі, Алматы технологиялық университетінің студенті Азамат Нәбиев бұл дайындықтың үлкен өмірлік мектеп болғанын жасырмайды.

«Оқу бізге кәсіби білім беріп қана қоймай, әскери маманның қандай жауапкершілік арқалайтынын түсіндірді. Біз командамен жұмыс істеп, күрделі жағдайда тез шешім қабылдауды үйрендік. Әскери ант қабылдау – алған білімімізді ел қауіпсіздігін қамтамасыз етуге жұмсауға толық дайын екеніміздің белгісі», – деп ағынан жарылды жас офицер.

Әскери институт мұнымен шектеліп қалмақ емес. Заманауи соғыс тәсілдерінің өзгеруіне және мемлекет қорғанысының жаңа талаптарына байланысты, 2025 жылдан бастап мұнда әуе шабуылына қарсы қорғаныс бағыты бойынша да запастағы офицерлер дайындала бастады. Ұшқышсыз ұшу аппараттары (дрондар) кеңінен қолданылатын қазіргі уақытта еліміздің әуе кеңістігін қорғайтын мұндай мамандардың орны ерекше маңызды.

Жалпы, институтта әскери даярлық бағдарламалары іске қосылғалы бері заманауи әскери-есептік мамандықтар бойынша 190-нан астам запастағы офицер мен сержант дайындалып үлгерді.