Ақтөбеде 35 мың орындық халықаралық стадион құрылысы қызу жүріп жатыр

Ақтөбе қаласының «Алтын Орда» шағын ауданында халықаралық стандарттарға сай жаңа футбол стадионы бой көтеріп келеді. Өңір басшысы Асхат Шахаров аймақтағы ең ірі спорт нысандарының біріне арнайы барып, құрылыс барысын қадағалады - бұл туралы Ақтөбе облысы әкімдігінің ресми сайты хабарлады.

Жаңа стадион 34 980 көрерменге шақталған. Қазіргі уақытта құрылыс алаңында негізгі монтаждау жұмыстары қарқын алған. Жобаны жүзеге асырып жатқан түркиялық мердігер компанияның спорттық нысандар салуда халықаралық тәжірибесі зор: олар осыған дейін әлемнің әр түкпірінде жиырмаға жуық стадионның құрылысына қатысқан.

Мердігер компания өкілі Фатих Татлыпаямның айтуынша, жұмыс бекітілген жоспар бойынша жүріп жатыр:

"Біздің ең ірі жобамыз – Анкарадағы стадион. Оның құрылысы биыл қыркүйекте аяқталады. Біз негізінен спорттық және туристік инфрақұрылым нысандарын салуға машықтанғанбыз. Ақтөбедегі стадион 10 блоктан тұрады. Қазір бірінші блокта іргетас құю, бетондау және бағаналарды орнату жұмыстары жүрсе, үшінші блокта монолиттік жұмыстар жалғасуда. Ал бесінші блок бетон құюға толық дайын. Жыл соңына дейін монолиттік жұмыстардың негізгі бөлігін аяқтап, темірбетон қаңқасын тұрғызуға кірісеміз", – деді ол.

Қазір құрылыс басында 152 адам еңбек етіп жүр. Жұмыс көлемінің артуына байланысты мамандар қатары да көбеймек. Әсіресе, сантехникалық, инженерлік және механикалық жұмыстар басталған шақта жұмысшылар саны 700 адамға дейін жетеді деп жоспарланған.

Облыс әкімі Асхат Шахаров бұл кешеннің тек спортты дамытып қана қоймай, өңірдің мәдени және туристік әлеуетін арттыруға да үлкен үлес қосатынын атап өтті.

"Өңірде футбол қарқынды дамып келеді. Алайда 35 мың көрерменге арналған бұл алып нысан тек матчтар өткізумен шектелмейді. Мұнда ірі мәдени іс-шаралар мен концерттер ұйымдастыруға толық мүмкіндік бар. Еліміздің атын әлемге танытып жүрген дарынды жерлестеріміз болашақта осы алаңда өнер көрсете алады", – деді аймақ басшысы.

Сонымен қатар, стадионның іске қосылуы қарыштап дамып келе жатқан «Алтын Орда» ауданында қызмет көрсету саласы мен шағын бизнестің өркендеуіне жаңа серпін бермек.

Қазір нысан құрылысы қатаң бақылауда және бекітілген кестеге сай жүргізілуде. Негізгі құрылыс-монтаж жұмыстарын келесі жылдың соңына дейін толық аяқтау жоспарланып отыр.