«Ақ жол» партиясы Журналистер күніне орай бильярдтан турнир өткізді

Астанада Журналистер күні қарсаңында «Ақ жол» демократиялық партиясының ұйымдастыруымен қазақтың белгілі спорт комментаторы Амангелді Сейітханды еске алуға арналған дәстүрлі бильярд турнирі өтті.

Зиялы қауым мен БАҚ өкілдерінің басын қосқан маңызды шараға «Ақ жол» партиясы фракциясының жетекшісі Азат Перуашев пен партияның Ұлттық кеңесінің хатшысы Арман Сқабылұлы арнайы қатысты. Дүбірлі додаға ақпарат, мәдениет және әдебиет саласының майталмандарынан жасақталған 8 команда қатысып, жасыл кілем үстінде өзара мықтыны анықтады.

Жарыстың бас төрешісі міндетін қазақ журналистикасының ардагері Қайнар Олжай атқарды. Турнир тек спорттық сайыс қана емес, сағынышқа толы сырласу алаңына айналды. Ойын барысында әріптестері қазақ спорт журналистикасында өзіндік қолтаңбасы қалған аңыз комментатор туралы жылы естеліктерімен бөлісті.

Тартысты өткен ойын қорытындысы бойынша «Ұлттық арна» командасы жүлделі үшінші орынды иеленсе, күміс жүлде «Нұрсая» командасына бұйырды. Ал шеберлігімен дараланған «Айқын» газетінің құрамасы турнирдің бас жүлдесін қанжығасына байлап, жарыс жеңімпазы атанды.