Әскердегі әйелдер: Қазақстанда қыз-келіншектерді қандай әскери мамандықтарға даярлайды?

Бүгінде әйелдер Қазақстан Республикасы Қарулы күштерінің ажырамас бөлігіне айналып, елдің қорғаныс қабілетін нығайтуға елеулі үлес қосып келеді, деп жазды - ҚР Қорғаныс министрлігі баспасөз қызметі.

Олар ер азаматтармен қатар әскери қызметтің түрлі бағыттарында кәсіби міндеттерін абыроймен атқарып жүр.

Қазіргі таңда Қазақстан армиясының қатарында 7 мыңға жуық әйел қызмет етеді. Олардың ішінде:

• 1 000-ға жуығы – офицерлер;

• 6 000-нан астамы – келісімшарт бойынша әскери қызметшілер;

• 11 әйел басшылық лауазымдарды атқарады.

Әйел әскери қызметшілер Қарулы күштердің барлық түрлері мен әскер тектерінде қызмет етеді. Олар тек көмекші қызметтермен шектеліп қалмай, әскери медицина, психология, қаржы, заң, байланыс, кадр жұмысы, материалдық-техникалық қамтамасыз ету және ақпараттық технологиялар салаларында жауапты міндеттерді атқарып келеді. Бұл – олардың әскери басқару жүйесінің маңызды буындарында табысты еңбек етіп жүргенінің айқын көрінісі.

Кейінгі жылдары әйелдердің әскери қызметтегі мүмкіндіктері едәуір кеңейді. Бүгінде олар жауынгерлік қамтамасыз ету бөлімшелерінде де қызмет атқарып, штаб офицері, нұсқаушы, ұшқыш, мерген және арнайы мақсаттағы бөлімшелердің әскери қызметшісі сияқты күрделі мамандықтарды меңгеруде. Сондай-ақ, нәзік жандылар ерлермен бірге парашютпен секіріп, ұшқышсыз ұшу аппараттарын басқарады және жауынгерлік әзірлікті қамтамасыз етуде маңызды рөл атқарады.

Әскери мансапты таңдаған қыз-келіншектер үшін кәсіби білім алуға да толық жағдай жасалған.

• 2002 жылы Құрлық әскерлерінің әскери институтында алғаш рет «Байланыс» мамандығы бойынша әйел мамандар даярланды. Олардың көбі бүгінде полковник шеніне дейін көтерілді.

• 2023 жылдан бастап Талғат Бигелдинов атындағы Әуе қорғанысы күштерінің әскери институты әскери-медициналық факультетке қыздарды қабылдай бастады. Түлектерге «лейтенант» шені беріліп, олар Қазақстан армиясында қызметін жалғастырады.

Айта кету керек, қолданыстағы заңнамада әйелдерді мерзімді әскери қызметке міндетті түрде шақыру көзделмеген және қазіргі уақытта мұндай норманы енгізу мәселесі қарастырылып жатқан жоқ. Қарулы күштермен келісімшарт жасасуға ниет білдіргендер толық ақпарат алу үшін жергілікті әскери басқару органдарына немесе әскери бөлімдерге жүгіне алады.