Абай облысындағы орман өрті: Тілсіз жауды ауыздықтауға Қорғаныс министрлігінің авиациясы жұмылдырылды
Ми-171Ш Абай облысындағы өрт ошақтарына 30-дан астам су төгу операциясы: Әскери авиация орманды қалай құтқарып жатыр?
16 шілдеде Абай облысының Бородулиха ауданында басталған ірі орман өртін ауыздықтауға Қорғаныс министрлігінің авиациясы жұмылдырылды. Тілсіз жауды сөндіру жұмыстарына Қазақстан Республикасы Қарулы күштері Әуе қорғанысы күштерінің әскери қызметшілері Төтенше жағдайлар министрлігінің (ТЖМ) бөлімшелерімен бірлесе отырып қатысуда.
Төтенше жағдай орын алған аймақтағы аптап ыстық, өрт қаупінің аса жоғары деңгейі және жер бедерінің күрделілігі тілсіз жаумен күресті қиындата түсті. Сондықтан өртті ауыздықтауға ТЖМ бөлімшелерімен қатар, Қорғаныс министрлігінің арнайы техникасы мен күштері қосылды.
Тілсіз жаудың таралуын тоқтатуда су төгу құрылғыларымен жабдықталған армиялық авиация тікұшақтары басты рөл атқаруда. Әскери ұшқыштар өрт ошақтарына әуеден су төгіп, жердегі бөлімшелердің тиімді жұмыс істеуіне қолайлы жағдай жасап келеді.
Әуе қорғанысы күштерінің Ми-17 және Ми-171Ш тікұшақтары өрт ошақтарына 30-дан астам рет көтеріліп, жалпы көлемі 57 тонна су төкті. Авиацияның әуеден үйлесімді соққысы өрттің таралу жылдамдығын бәсеңдетіп, жердегі күштердің өртті оқшаулауына мүмкіндік тудырды.
Төтенше жағдайды жоюға Қорғаныс министрлігінің үш тікұшағы (екі Ми-17, бір Ми-171Ш) тартылды. Олар ТЖМ және басқа да жауапты қызметтермен бірлесе отырып, тілсіз жауды сөндіру, елді мекендерді және орман қорын аман алып қалу бойынша қажетті шараларды атқаруда.
Пікірлер
Әзірге пікір жоқ. Алғашқы пікірді қалдырыңыз!
