7300-ден астам нақты жалақы талдалды: Қазақстандағы IT-мамандардың еңбек нарығы қалай өзгерді?

Астанада Қазақстандағы IT-мамандардың еңбек нарығына арналған үшінші жыл сайынғы зерттеудің қорытындысы таныстырылды. Іс-шараға отандық IT-компаниялардың басшылары мен HR-директорлары қатысып, саладағы ең өзекті трендтерді талқылады.

People Consulting компаниясы қатарынан үшінші жыл жүргізіп отырған зерттеудің басты ерекшелігі – барлық мәліметтер бос жұмыс орындары немесе сауалнамалардан емес, компаниялардың өзінен, яғни нақты төленетін жалақы деректерінен алынған.

• Қатысқан компаниялар саны: 24 компания (оның жартысы жобаға биыл алғаш рет қосылды).

• Қамтылған мамандықтар: 68 IT-мамандық.

• Талданған дерек: 7 300-ден астам нақты жалақы.

People Consulting компаниясының HR-консалтинг бағытының серіктесі Александр Прокопенконың мәлімдеуінше, IT-саласындағы жалақыны өсіру арқылы бәсекелесу үрдісі біртіндеп тоқтап келеді. Қазіргі таңда мамандарды тарту үшін ақшадан бұрын қызықты жобалар, заманауи технологиялар және инженерлік мәдениет маңыздырақ бола бастаған.

«Бірнеше жыл бұрын компаниялар ең алдымен жалақымен бәсекелесетін. Қазір мамандар кәсіби ортаға көбірек мән береді. Зерттеу көрсеткендей, сирек кездесетін құзыреттері бар мамандарға сұраныс әлі де өте жоғары. Ал кең таралған бағыттар тұрақтанып, автоматтандыру кезеңіне өтіп жатыр», – деп атап өтті Александр Прокопенко.

Зерттеу нәтижесіне сай, биыл жалақысы ең көп өскен мамандықтар қатарына мыналар кірді:

• PHP әзірлеушілері

• DevSecOps мамандары

• Ақпараттық қауіпсіздік сарапшылары

• Корпоративтік шешімдер архитекторлары

Спикерлердің айтуынша, алдағы жылдары жасанды интеллект (AI) саласындағы кез келген маманның емес, тек тәжірибесі мен біліктілігі жоғары сарапшылардың табысы арта береді. Себебі мұндай кадрлар нарықта әлі де тапшы.

Sergek Group компаниясының HR-директоры Жыпар Саттарова жасанды интеллект құралдарының кадрлық шешімдер қабылдау тәсілін қалай өзгертіп жатқанымен бөлісті. Ол компанияда грейдтеу және HR-аналитика үшін Vibe Coding тәсілі сәтті қолданылып жатқанын жеткізді.

«Бұрын функциялар мен рөлдерді талдау ұзақ уақытты, көптеген Excel кестелерін және қол еңбегін талап ететін. Қазір AI мен Vibe Coding функционалдық, семантикалық және ұйымдық талдауды әлдеқайда жылдам әрі терең жүргізуге мүмкіндік береді. Соның арқасында мамандар бизнеске нақты жағдайды көріп, басқарушылық шешімдерді дәл қабылдауға көмектеседі», – деді Жыпар Саттарова.

Кездесу барысында өңірлер арасындағы жалақы айырмашылығы біртіндеп азайып келе жатқаны айтылды. Сонымен қатар, банк секторы, телекоммуникация және өнімдік IT-компанияларындағы еңбекақы деңгейі де бір-біріне жақындай түскен. Дегенмен, әр саланың таланттарды тарту және ұстап қалу стратегиясы өз ерекшелігін сақтап отыр.