16-ға толмадың ба – желі жоқ: Президент жаңа заң ұсынды
Қазақстанда 16 жасқа толмағандарға әлеуметтік желіге тіркелуге заң жүзінде тыйым салынбақ. Бұл туралы Президент тамыз кеңесінде мәлімдеді.
«Үкімет 16 жасқа дейінгілердің әлеуметтік желіге тіркелуіне тыйым салатын заң жобасын әзірледі. Құрылтайдың бірінші сессиясының ашылуында депутаттарға осы мәселені қарауды ұсынамын», – деді ол.
Президенттің айтуынша, 2018 жылы қабылданған «Балаларды денсаулығы мен дамуына зардабын тигізетін ақпараттан қорғау туралы» заңды қазіргі заман талабына сай қайта қарап, оған маңызды өзгерістер енгізу қажет.
«Әлеуметтік желілер, цифрлық платформалар, жасанды интеллект пен агрессивті маркетинг баланың дүниетанымына отбасы мен мектептен кем әсер етпейді. Өскелең ұрпақтың психологиялық саулығы, эмоциялық тұрақтылығы мен адамгершілік тәрбиесі қазірдің өзінде ұлттық қауіпсіздік пен елдің тұрақты дамуының маңызды факторларына айналды», – деді Тоқаев.
Ол дамыған елдердің көбі мұндай қадамға барып үлгергенін атап өтті.
«Бізге де балалардың психологиясына төнетін қауіптердің салдарымен күресуден гөрі, оның алдын алуға көшетін кез келді деп санаймын. Әйтпесе, бұл қоғамдағы тұрақтылыққа кері әсер етуі мүмкін», – деп баса айтты Мемлекет басшысы.
Оның сөзінше, Үкімет балаларды қорғау үшін контентті сүзгілеу шараларын қолға алуы тиіс.
«Тек ата-ананың жауапкершілігіне арқа сүйей алмаймыз, оның белгілі бір объективті себептері де бар. Сондықтан ақпараттық иммунитетті қамтамасыз ете алатын міндетті "балаларға арналған SIM-карталарды" енгізуді ауқымды түрде қолға алуды тапсырамын», – деп қорытындылады Тоқаев.
Еске сала кетейік, бұған дейін Қазақстанда балалардың әлеуметтік желілерге кіруін шектеу мәселесі қаралып жатқаны хабарланған еді. Жаңа түзетулер онлайн-платформалар мен масс-медиа қызметін реттеп, 16 жасқа толмаған азаматтардың әлеуметтік желіге тіркелуіне тыйым салуды көздейді.
Пікірлер
Әзірге пікір жоқ. Алғашқы пікірді қалдырыңыз!
