20 трлн теңгеден астам: 2025 жылы қазақстандықтар қанша тапты?

Ұлттық статистика бюросы елдегі еңбек нарығының ауқымды қорытындысын жариялады. Ресми дерекке сүйенсек, 2025 жылы Қазақстандағы жалдамалы қызметкерлердің жалпы еңбекақы қоры 20,4 триллион теңгеден асқан.

Бүгінде ел аумағында 90,5 мыңнан астам кәсіпорын жұмыс істеп тұр, ал нақты жұмыспен қамтылғандар саны 3,8 миллион адамды құрайды.

Қаржы орталықтары мен батыс өңірлер көш бастап тұр

Еңбекақы қорының көлемі бойынша мегаполистер мен мұнай өндіруші аймақтар дәстүрлі түрде алдыңғы қатарда:

• Алматы қаласы: 3,56 трлн теңге;

• Астана қаласы: 2,47 трлн теңге;

• Атырау облысы: 1,28 трлн теңге;

• Маңғыстау облысы: 1,21 трлн теңге.

Ал жұмыс күшінің шоғырлануы бойынша жағдай сәл өзгеше. Ең көп жұмыскер Алматы (534,2 мың адам) мен Астана (347 мың адам) қалаларында тіркелген. Сондай-ақ, бұл тізімнің басында демографиялық өсімі жоғары Түркістан (261,9 мың) және өндірістік Қарағанды (261,2 мың) облыстары тұр.

Кім көп төлейді?

Статистика көрсеткендей, ел экономикасындағы жалақы қорының тең жартысынан астамын ірі корпорациялар мен компаниялар қамтамасыз етіп отыр:

• Ірі бизнес: 11,14 трлн теңге;

• Орта бизнес: 5,24 трлн теңге;

• Шағын бизнес: 4,05 трлн теңге.

Бұл көрсеткіштер еліміздегі жұмыс күшінің негізгі бөлігі ірі өнеркәсіп пен корпоративтік секторда екенін, ал шағын бизнестің еңбекақы қорындағы үлесі әлі де арттыруды қажет ететінін аңғартады

Дереккөз: Нарық жаңалықтары telegram арнасы