Жол құрылысындағы жемқорлық: «ҚазАвтоЖол» лауазымды тұлғалардың былығын әшкереледі
Мемлекеттік қызметкерге теңестірілген техқадағалау мамандары жемқорлықпен ұсталды
«ҚазАвтоЖол» ұлттық компаниясы жол құрылысы нысандарында бірнеше жемқорлық дерегін анықтағанын мәлімдеді. Екі бөлек іс бойынша жинақталған материалдар құқық қорғау органдарына жолданды.
Компания мәліметінше, олардың өз бастамасымен берген хабарламасы негізінде 2026 жылғы 8 шілдеде Ұлттық қауіпсіздік комитетінің Солтүстік Қазақстан облысы бойынша департаменті арнайы операция жүргізген. Нәтижесінде мердігер ұйымның техникалық қадағалау жөніндегі бас инженері пара алып жатқан жерінде ұсталды. Тергеу мәліметтеріне сүйенсек, ол орындалған жұмыстардың аралық актісіне қол қойғаны үшін жалпы соманың 1 пайызы көлемінде «ауызбастырық» талап еткен.
Бұдан бөлек, «ҚазАвтоЖол» жүргізген қызметтік тексеру мен аудиторлық қорытындылар Көкшетау көлік прокуратурасына өткізілді. Осы құжаттар негізінде «ҚАЖсервис» ЖШС Ақмола облыстық филиалының лауазымды тұлғаларына қатысты Қылмыстық кодекстің 250-бабының 1-бөлігімен сотқа дейінгі тергеу басталды. Алдын ала есеп бойынша, мемлекетке келтірілген шығын көлемі 24 миллион теңгеден асады.
Ұлттық компания бұл заңбұзушылықтар ішкі бақылау, аудит және сыбайлас жемқорлыққа қарсы комплаенс жүйесінің қатаң жұмыс істеуінің арқасында әшкереленгенін атап өтті. «ҚазАвтоЖол» қылмыстық жазаның бұлтартпастығы қағидатын ұстана отырып, құқық қорғау және қадағалау органдарымен тығыз қарым-қатынасын жалғастыра бермек.
Еске сала кетейік, 2025 жылдың шілдесінен бастап техникалық және авторлық қадағалау мамандары мемлекеттік функцияларды атқаратын тұлғаларға теңестірілген. Демек, олар да жемқорлық құқық бұзушылықтары үшін заң алдында қатаң жауап береді.
Пікірлер
Әзірге пікір жоқ. Алғашқы пікірді қалдырыңыз!
