Жасанды интеллект «шаршады» ма?

Әлемдегі ең танымал нейрожелінің бірі – ChatGPT - де бұрын-соңды болмаған ауқымды іркіліс тіркелді. OpenAI компаниясының басты өнімі қатарынан сегізінші күн бойы тұрақсыз жұмыс істеп, құрылғы серверлерінің «құлауы» жүз мыңдаған пайдаланушының жұмысын тоқтатып тастады.

Detector404 және Downdetector сияқты ірі мониторинг сервистерінің мәліметінше, жасанды интеллекттің істен шыққанын әлем бойынша 70 мыңнан астам адам ресми түрде хабарлаған. Ақаулардың басым бөлігі АҚШ, Германия және Ресей аумағындағы пайдаланушылар арасында байқалды.

Алғашқы дабыл таңғы уақытта қағылды. Бастапқыда небәрі 20 адам жүйеге кіре алмай жатқанын айтса, арада небәрі 40 минут өткенде шағымданушылар саны күрт өсіп, шарықтау шегіне жеткен. Оқырман назарын аударарлық жайт – OpenAI компаниясы бұл олқылықты жасырмай, өз сайтында чат-бот жұмысында «проблемалар» бар екенін ресми түрде растады және оларды жою жұмыстары жүріп жатқанын мәлімдеді.

Сарапшылардың айтуынша, жүйедегі келеңсіздіктер тек бүгін ғана емес, қатарынан сегіз күн бойы жалғасып келеді. Әсіресе 15, 18 және 19 шілде күндері тіркелген іркілістер өте ауқымды болды:

15 шілде: Қолданушылар жүйедегі жалпы қателіктерге шағымданды. Тіпті көпшілік сүйіп қолданатын дауыстық режим (Voice Mode) мүлдем «сынып», істемей қалған.

18 шілде: Корпоративтік клиенттер Codex жүйесінің рұқсатынсыз ChatGPT қызметін толыққанды пайдалана алмады. Өз кезегінде, сол күні бағдарламашыларға арналған Codex жүйесінің өзінде де ауыр ақаулар тіркелді.

Еске сала кетейік, осыған ұқсас технологиялық коллапс биыл көктемде, яғни сәуір айында да орын алған еді. Ол кезде нарықтағы ең мықты саналатын үш алып чат-бот – ChatGPT, Gemini және Claude бір уақытта істен шығып, бүкіл әлемдік IT-қоғамдастықты дүр сілкіндірген болатын. Жасанды интеллекттің бұлай жиі «сыр беруі» технологиялық алпауыттардың ресурстары шексіз еместігін және жүйенің аса үлкен жүктемелерге төтеп бере алмай жатқанын көрсетіп отыр.