Сайлау алдындағы дипфейк толқыны: TikTok жаңа құрал іске қосты
Бүгінде экраннан көргеннің бәріне сене беруге болмайды. TikTok саясаткерлер мен мемлекеттік органдарға өз бет-бейнесін рұқсатсыз пайдаланған жасанды интеллект контентін тауып, оған шағым түсіруге мүмкіндік беретін құрал ұсынды.

TikTok компаниясы жұма күні «Likeness Detection» деп аталатын жаңа функцияны кезең-кезеңімен енгізе бастағанын жариялады. Бұл функция міндетті емес, пайдаланушы оны өз қалауымен қосады. Ол контент авторларына платформада өз бет-бейнесі жасанды интеллект арқылы пайдаланылған материалдарды тауып, белгілеуге көмектеседі. Компания осылайша ЖИ арқылы жасалған жалған ақпаратқа тосқауыл қоюды көздейді.
Құрал ең алдымен қоғам қайраткерлеріне арналған: мемлекеттік органдардың өкілдеріне, саясаткерлерге және саяси партиялардың аккаунттарына. Олар өз келісімінсіз бейнесі пайдаланылған ЖИ контентін анықтап, ол туралы хабарлай алады.
Жаңалықтың дәл қазір шығуы кездейсоқ емес. Еуропа қазірдің өзінде сайлау үдерісіне нұқсан келтіріп жүрген жалған ақпарат толқынына және ЖИ арқылы жасалған дипфейк науқандарына тап болып отыр. Алдағы 12 айда Еуропаның тоғыз елінде сайлау өтеді, сондықтан бұл құралдың маңызы арта түсуі мүмкін.
Құрал қалай жұмыс істейді?
Талапқа сай келетін пайдаланушылар сенімді үшінші тарап серіктесі арқылы жеке басын растап, тіркеледі. Содан кейін TikTok-тағы қандай да бір контент немесе аккаунт олардың бет-бейнесін пайдалануы мүмкін болса, оларға хабарлама келеді. Мұндай материалдарды құралдың ішінде көруге болады. Қажет болса, пайдаланушы шағымын тікелей TikTok-тың қауіпсіздік командаларына жібереді, ал олар контентті тексеріп, тиісті шара қолданады.
Заң не талап етеді?
Еуропалық одақ 2 тамыздан бастап Жасанды интеллект туралы заң аясында ЖИ саласындағы ашықтық ережелерін кезең-кезеңімен енгізе бастады. Бұл талаптардың бірі – дипфейктер мен ЖИ жасаған өзге де контентті міндетті түрде таңбалау.
TikTok соңғы жылдары дипфейктердің таралуын шектеу үшін бірқатар қадам жасады. Мысалы, заң талабына сай, контент авторларынан ЖИ жасаған шынайы көрінетін сурет, аудио және бейнежазбаларды арнайы белгімен таңбалауды талап етеді.
ЖИ контентін қалай ажыратуға болады?
Компания тағы бір ашықтық құралын іске қосты. Ол арқылы кез келген контенттің платформаның ішкі функцияларымен жасалған не өзгертілгенін тексеруге болады.
TikTok-тың айтуынша, «Identify AI-Generated Content» (ағылшын тілінде) құралы барлығына тегін, оны TikTok-та аккаунты жоқ адамдар да қолдана алады.
Пайдаланушы сурет немесе бейнежазбаны жүктеп, оның TikTok-тың өз ЖИ құралдарымен жасалған не өңделгенін тексере алады. Оларға ByteDance компаниясының CapCut, Dreamina, Hypic және Pippit қосымшалары да кіреді. Құрал JPEG, PNG, MP4 сияқты кең таралған форматтардың көбін қолдайды. Файл көлеміне шектеу бар: сурет 20 мегабайттан, бейне немесе аудио 100 мегабайттан аспауы керек.
Тексеру екі белгіге сүйенеді. Біріншісі – TikTok пен ByteDance қосымшалары файлға қосатын «цифрлық куәлік» метадеректері. Екіншісі – контенттің өзіне енгізілген, көзге көрінбейтін әрі өшіруі қиынырақ су таңбалары.
Компанияның мәлімдеуінше, жүктелген материалдың бәрі тексерілгеннен кейін бірден жойылады және ЖИ модельдерін оқытуға пайдаланылмайды.
Дегенмен TikTok бір жайтты ескертеді: құрал тек компанияның өз қосымшалары мен ByteDance сервистері арқылы жасалған не өңделген контентті ғана анықтайды. Демек, ол кез келген ЖИ контентін мүлтіксіз әшкерелей алмайды.
Пікірлер
Әзірге пікір жоқ. Алғашқы пікірді қалдырыңыз!










