Жамбылдағы жаңалық: Қайтарылған активтердің арқасында 80 мыңнан астам адам газбен қамтылмақ

«Шетелге заңсыз кетіп, мемлекетке қайтарылған активтер» деген тіркесті біз соңғы кездері жиі естиміз. Көпшілік үшін бұл жоғары эшелондағы саяси процесс қана сияқты көрінуі мүмкін. Алайда, дәл қазір сол қайтарылған миллиардтар қағаз жүзінде емес, нақты адамдардың өмірін өзгертіп жатыр. Соның бір айқын мысалы – Жамбыл облысындағы Шу қаласында бой көтеріп келе жатқан жаңа газ тарату стансасы. Бұл – жай ғана темір мен құбыр емес, ондаған мың отбасының қақаған қыстағы жылуы мен жайлылығының кепілі.

Шу мен Мойынқұм аудандарының тұрғындары үшін қыс мезгілі үнемі үреймен қатар жүретін. Себебі, тұтас бір аймақтың газ жүйесі 100 шақырымнан астам қашықтықта орналасқан «Қордай» стансасына телміріп қалған еді. Жыл өткен сайын халық саны өсті, жаңа үйлер салынды, кәсіпорындар ашылды. Ал ескі стансаның қуаты бұл сұранысты көтере алмады.

Жүйеге салмақ түскен сайын, тұрғындар қыстыгүні газдың қысымы төмендеп, үйдің суитынын жақсы біледі. Одан қалды, жаңадан шаңырақ көтерген жас отбасылар немесе кәсібін дөңгелетем деген азаматтар үйлері мен ғимараттарына газ тарта алмай, табалдырық тоздыратын. Өйткені жүйеде бос қуат жоқ болғандықтан, техникалық шарттар беру тоқтатылған еді. Инфрақұрылымдық тығырық бүтін екі ауданның дамуына тұсау болып келді.

Түйткілдің түйіні биыл шешілгелі тұр. Мемлекет басшысының елімізді газбен қамту деңгейін 80 пайызға жеткізу жөніндегі тапсырмасы аясында Үкімет шешім қабылдап, заңсыз шығарылған капиталдар жиналатын Арнаулы мемлекеттік қордан тура 2,9 миллиард теңге бөлді. Қаржы Шу қаласындағы жаңа автоматтандырылған газ тарату стансасының құрылысын аяқтауға бағытталып отыр.

Бұл дегеніміз не? Бұл – Шу және Мойынқұм аудандарындағы 84 мыңнан астам адам үшін қысқы азаптың артта қалуы. Жаңа станса іске қосылған сәттен бастап тұрғын үйлер, орталық қазандықтар және бизнес нысандары көгілдір отынмен үздіксіз қамтамасыз етіледі. Ең бастысы – «газға қосылуға рұқсат жоқ» деген бұрынғы шектеулердің күші жойылып, мыңдаған жаңа абоненттерге есік айқара ашылады.

Қазір құрылыс басында қызу жұмыс жүріп жатыр. Күн-түн демей еңбектеніп жатқан мамандар қазірдің өзінде 29 алып қондырғы мен жабдықтар жиынтығын орнатып үлгерді. Дәл қазір жүректің қантамырларындай болған блокаралық коммуникацияларды қосу, дәнекерлеу жұмыстары жүргізілуде. Жақында бұл суық темірлерге жан бітіп, аудан халқына жылу болып тарайды.