YouTube-тың дәуірі аяқтала ма? Bilibili видеосервисі әлемдік нарыққа шықты

YouTube-тың тікелей бәсекелесіне айналған қытайлық Bilibili платформасы жаһандық нарықта өз үстемдігін орнатуға кірісті. Semafor басылымының мәліметінше, компания бұған дейін жабылып қалған халықаралық қосымшасын қайта іске қосып, толыққанды ағылшын тіліндегі сайт ашуды жоспарлап отыр. Қазірдің өзінде АҚШ, Жапония және Еуропа елдеріндегі негізгі нарықтардан мықты мамандарды жұмысқа тарту басталды.

Бұл жай ғана жоспар емес. Айлық белсенді аудиториясы 376 миллион қолданушыдан асатын Bilibili батыстың танымал жұлдыздарымен келісімшартқа отырып жатыр. Олардың қатарында әлемге әйгілі MrBeast те бар. Мұндай ауқымды жаһандық экспансия YouTube-тың нарықтағы жеке-дара билігіне үлкен қауіп төндіруі мүмкін. Дегенмен, сарапшылар кезінде TikTok тап болған цензура, контентті модерациялау және деректер қауіпсіздігіне қатысты мәселелер АҚШ-та қайта көтерілуі ықтимал екенін де жоққа шығармайды.

Жаңартылған халықаралық қосымшаның басты артықшылығы – шетелдік қолданушылардан жеке басты куәландыратын құжаттарды талап етуді тоқтатқанында. Платформа әкімшілігі Bilibili-дің әлемдік деңгейге шыққанын растап, АҚШ пен Қытайдағы сайттардың мазмұны бірдей болатынын мәлімдеді. Маркетингтік құжаттарға сүйенсек, бұл жоба инфлюенсерлер үшін табыс табудың жаңа көзіне айналмақ. Әсіресе, төлем қабілеті жоғары, білімді Z ұрпағымен (Gen Z) байланыс орнатуға басымдық берілген. Сондай-ақ, әлемдік брендтермен тікелей ынтымақтастық орнатуға мүмкіндік беретін арнайы сауда алаңы да әзірленіп жатыр.

Қазіргі таңда қытайлық сайтқа видео жүктеу нұсқаулықтары белсенді таралып жатыр, ал ағылшын тіліндегі нұсқасы қызу өңделу үстінде. Компания Лос-Анджелес, Лондон, Мехико, Сан-Паулу, Ыстамбұл және Токио қалаларында комьюнити-менеджерлерді жұмысқа қабылдауда. Оған қоса, жасанды интеллектке негізделген контентті модерациялаудың жаһандық жүйесі де жасалып жатыр.