VK Apple-ді сотқа берді: Ресейлік компания не талап етіп отыр?
Ресейлік IT-алыптың негізгі бағдарламалары мен Max мессенджері енді App Store мен Google Play дүкендерінде жоқ. Apple-дің бұл тосын қадамына жауап ретінде VK Мәскеу сотында шағым түсірді. Олардың басты талабы — жүйені қайтару ғана емес, бұғатталған хабарламалар (push) үшін де жауапқа тарту. Технологиялық алпауыттардың бұл текетіресі немен аяқталмақ?
Ресейлік «VK» IT-холдингі америкалық Apple корпорациясын сотқа берді. Басты себеп — App Store платформасынан холдингке тиесілі қосымшалардың ешбір ескертусіз, сыпырылып өшірілуі. Қазіргі таңда іс Мәскеудің Арбитраж сотында қаралып жатыр.
Соттағы жауапкерлер қатарында тек бас компания Apple Inc. қана емес, сондай-ақ Apple Distribution International Ltd. пен ресейлік «Эппл рус» ЖШС де бар.
«Apple біздің қосымшаларды App Store-дан ескертусіз, біржақты тәртіпте өшіріп тастады. Біз сот арқылы бағдарламаларымызды дүкенге қайтаруды және қолданушыларға хабарлама (push) келу жүйесін қалпына келтіруді талап етеміз. Оған қоса, сот шешімі орындалмаған жағдайда айыппұл өндіріп алуды көздеп отырмыз», — деп мәлімдеді VK баспасөз қызметі.
Еске сала кетейік, биылғы маусым айында Apple корпорациясы VK холдингінің басты қосымшаларын және Max мессенджерін өз платформасынан алып тастаған болатын. Ол кезде ресейлік компания өздерінің ешқандай санкциялық тізімде жоқ екенін алға тартып, бұл қадамның негізсіз екенін айтқан. Алайда, шілде айының ортасынан бастап VK мен Max ресми түрде Еуропалық Одақ санкциясына ілігіп, іле-шала Google Play дүкенінен де аласталды.
Пікірлер
Әзірге пікір жоқ. Алғашқы пікірді қалдырыңыз!
