Тығылатын жер қалмады: Жасанды интеллект Жерді ғарыштан өзі-ақ аңди бастады
Енді жердегі тіршілікті бақылау үшін адамның да қажеті жоқ.
Ғарыштан аңдудың жаңа деңгейіне қош келдіңіздер: енді жердегі тіршілікті бақылау үшін адамның да қажеті жоқ. Loft Orbital компаниясының YAM-9 жерсерігі тарихта бірінші рет жер бетіндегі нысандарды оператордың нұсқауынсыз, жасанды интеллектің күшімен өзі тауып алды. Иә, бізді төбеден бақылайтын темір-терсектің енді өз «миы» бар. Бұл – орбитада визуалды-сөйлеу моделінің (VLM) тікелей қолданылған алғашқы жағдайы.
Бұл тәжірибеге NASA-ның NAVI-Orbital бағдарламасы мен Google DeepMind жасаған Gemma 3 моделі жұмылдырылған. Бұрын жерсеріктер түсірген тонналаған суреттерін «мә, өздерің талдап алыңдар» дегендей Жерге жіберетін болса, енді ол ақпаратты ғарыштың өзінде қорытып, кәдімгі адам тіліндегі іздеу бұйрықтарын орындай береді. Сынақ кезінде бұл «ақылды» аппарат қала мен табиғат шекарасын, теміржол маңындағы инфрақұрылымдарды оп-оңай тауып берген.
Жасаушылардың айтуынша, бұл технология Жерге жіберілетін мәліметтер көлемін азайтып, маңызды оқиғаларды тезірек тіркеуге көмектеседі-мыс. Ал болашақта мұндай жерсеріктер берілген аймақтарды кірпік қақпай күзетіп, кез келген «күдікті әрекетті» бірден хабарлайтын болады. Демек, Жердегі әрбір қадамымызды үзіліссіз қадағалайтын жасанды интеллект тобырының ауылы алыс емес. Тіпті бұл тәжірибе ертең Ай мен Марсқа баратын астронавттарға цифрлық көмекші жасауға да негіз болмақ. Ең бастысы, сол көмекшілер ғарышта көтеріліс жасап кетпесе болғаны.
Толығырақ оқу: ozgeris.info | TechCrunch
