Триллион долларлық жарыс: Nvidia банктерді қалай көндірді?
Технологиялық алыптардың қаржысы таусылып, тығырыққа тірелген шақта, Nvidia жарты триллион долларды қайдан тапты? Уолл-стрит алпауыттарын жай ғана темір саналатын чиптерді табысты электр станциясына теңеуге не мәжбүр етті? Алып корпорациялардың жасырын қаржылық айласы мен алдағы триллиондық шығындардың сыры ашылды. Толығырақ төменде...
Nvidia компаниясы Уолл-стриттің ең алпауыт алты инвестициялық қорымен бірігіп, жарты триллион доллардан астам қаражат жинамақшы. Негізгі мақсат — жасанды интеллект саласында жүрген технологиялық алыптарға қарыз беріп, жиналған ақшаға өзінің чиптерін сату. Күрделі қаржылық терминдерді ысырып қойып, мәселенің мәнін қарапайым тілмен түсіндіріп көрейік.
Қазіргі таңда Microsoft, Amazon, Google сияқты алып корпорациялардың шығыны шаш етектен. Аталған корпорациялар жасанды интеллектіні дамыту үшін миллиардтап ақша шашып жатыр. Алайда қыруар қарызды компанияның негізгі қаржылық есебінде көрсету өте тиімсіз. Себебі инвесторлар шошып, акция бағасы құлдырауы мүмкін. Сондықтан жаңа, көзге көрінбейтін қаржыландыру көзі қажет болды.
Жүйенің жұмыс істеу механизмі өте қарапайым. Алдымен алты үлкен инвестициялық компания инвесторлардың ақшасын жинап, ортақ қор жасайды. Содан кейін технологиялық компаниялар қордан қарыз алып, қаражатты жаңа дата-орталықтар салуға, серверлер алуға және электр желілерін тартуға жұмсайды. Ең басты шарты — міндетті түрде Nvidia чиптерін сатып алу қажет. Өз кезегінде Nvidia қарыздың төрттен бір бөлігіне кепілдік береді. Нәтижесінде клиенттерге берілетін несие пайызы төмендейді. Ал негізгі тәуекелді несие беруші қорлар көтереді.
Ең қызықты тұсы — қаржылық ереженің өзгеруінде. Бұрын компьютер процессорлары тез ескіретін, құнын жылдам жоғалтатын қарапайым темір саналатын. Енді Nvidia басшысы Дженсен Хуанг банктерді чиптерді ұзақ мерзімді табыс әкелетін инфрақұрылым ретінде бағалауға көндірді. Яғни, қуатты процессорларды ендігі жерде ақылы тасжол немесе электр станциясы секілді ұзақ уақыт ақша әкелетін нысан қатарына жатқызу ұсынылып отыр. Процессорлар бір клиенттен екіншісіне ауысып, үздіксіз табыс таба береді.
Жасанды интеллект нарығының тәбеті өте зор. Сарапшылардың есебінше, алдағы жылдары технологиялық алпауыттардың шығыны екі есе артып, триллион доллардан асып түспек. Демек, корпорациялардың ішкі бюджеті таусылды. Ендігі даму үшін сырттан ауқымды несие тартуға тура келіп тұр, ал Nvidia кезекті рет ақша айналымының қақ ортасынан табылды.
Пікірлер
Әзірге пікір жоқ. Алғашқы пікірді қалдырыңыз!
