t.me сілтемелері неге ашылмай қалды? Telegram домені DNS жүйесінен өшірілді

Telegram мессенджері t.me доменінің жұмысы шектелгеннен кейін өз қосымшаларында жаппай telegram.me сілтемесіне көшті. WHOIS қызметінің мәліметінше, .me домендер тізілімінің әкімшілігі t.me доменін DNS аймағынан мүлдем өшіріп тастаған. Әзірге оқиғаның нақты себебі жұмбақ күйінде қалып отыр.

WHOIS базасында t.me доменіне қатысты «serverHold» мәртебесі пайда болды. ICANN (интернеттегі домен атаулары мен IP-мекенжайларды үйлестіретін халықаралық ұйым) ережесіне сай, мұндай шектеуді тіркеуші оператор қояды және бұл доменнің DNS жүйесінен аласталғанын білдіреді.

Бір қызығы, шектеуді тіркеуші компания (GoDaddy) емес, тікелей домен аймағының бас операторы – бүкіл .me аймағына жауапты черногориялық doMEn d.o.o. компаниясы енгізген. Ұйым – Identity Digital, GoDaddy және ME-net бірігіп құрған ортақ кәсіпорын.

Енді жазбалар мен хабарламалардың сілтемесін көшіргенде t.me орнына автоматты түрде telegram.me деп шығады. Дегенмен, Telegram қосымшасының өзі ескі t.me форматындағы сілтемелерді бұрынғыша таниды және оны мессенджер ішінде еш кедергісіз аша береді.

Ал браузердегі әдеттегі [suspicious link removed] сілтемелері DNS кэші жаңарған сайын ашылмай қалып жатыр. Бұл username.t.me форматындағы мекенжайларға да қатысты. Алдағы уақытта шақыру сілтемелері, арналарды веб-нұсқада оқу, боттар, авторизация және сілтемелерді алдын ала көру (превью) функциялары да істен шығуы мүмкін.

Айта кетерлігі, Павел Дуровтың X желісіндегі профилінде әлі де t.me сілтемесі тұр, бірақ ол ашылмайды. Бұл жағдайдың ең ықтимал себебі мынада: 2026 жылдың 13 шілдесінде АҚШ-тың Шетелдік активтерді бақылау басқармасы (OFAC) бұғаттауды айналып өтуге арналған провайдер қызметіне тыйым салған болатын. Тыйым салынған сервистердің «қара тізімінде» оның Telegram-арнасы «http://t.me/First*** веб-сайты» деген атпен ілініп кеткен.