Tesla-ның жүргізушісіз роботаксиі ғаламтор проблемасын қалай шешті?
Ғаламторсыз қалмайтын роботакси: Илон Маск рөлі мен педалі жоқ Cybercab көліктеріне Starlink орнатып, жолаушыларға 4K кино көруге жағдай жасады.
Tesla компаниясы Cybercab ұшқышсыз көлігіне Starlink құрылғысын ресми түрде біріктірді. Бұл ерекше көліктерді болашақта толыққанды роботакси қызметі үшін пайдалану жоспарланып отыр. Tesla Robotaxi-дің ресми парақшасында жарияланған суреттерден Starlink антеннасының көліктің артқы шатырында, шамдардың дәл үстінде орналасқанын байқауға болады. Қондырғы төртбұрышты панельмен әдемі жабылған, бұл оған эстетикалық талғам беріп қана қоймай, сыртқы әсерлерден мықтап қорғайды. Айта кетейік, бұған дейін Tesla Сан-Хоседегі көрме залында Starlink жүйесін көліктерге енгізу жоспарын көпшілікке таныстырған болатын.
Рөлі де, педалі де жоқ Cybercab үшін интернеттің үзіліссіз жұмыс істеуі ауадай қажет. Әсіресе ұялы байланыс нашар ұстайтын немесе мүлдем жоқ аймақтарда бұл функцияның маңызы арта түседі. Жылдамдығы секундына 375 мегабитке дейін жететін V5 тарелкасы бар Starlink желісі үздіксіз навигацияны, көліктер паркін қашықтан басқаруды және жолаушыларға жедел қолдау көрсетуді толық қамтамасыз ете алады.
Илон Маск бұл жүйенің ойын-сауықтық мүмкіндіктерін де ерекше атап өтті. Енді жолаушылар жол жүріп бара жатып, ешбір кідіріссіз 4K сапасындағы түрлі бейнематериалдарды тамашалай алады. Болашақта Маск Starlink жүйесін барлық Tesla көліктеріне орнатуды көздеп отыр. Оның сөзінше, бұл – миллиардтаған көлікті жоғары жылдамдықты интернетпен қамтамасыз етудің жалғыз тиімді жолы. Бұл ауқымды жоспар спутниктік интернетке де, қазіргі таңда әзірленіп жатқан Starlink мобильді байланысына да қатысты болуы әбден мүмкін.
Пікірлер
Әзірге пікір жоқ. Алғашқы пікірді қалдырыңыз!
