Техноалыптардың кезекті ермегі: Gemini енді көзге кірмек

Бәрімізді киборгқа айналдыруды көздеген технология алпауыттары тағы да бас қосты. Бұл жолы Google, Samsung және Qualcomm үшеуі бірігіп, Android XR платформасын өмірге әкелмекші. Иә, кезекті «әлемді өзгертетін» инновация. Жоспар бойынша, жоба аясында ақылды көзілдіріктердің екі түрлі форматы жарық көреді. Біріншісі - көпшілікке таныс Meta Ray-Ban стиліндегі, дисплейі жоқ, бірақ камерасы мен динамигі бар қарапайым нұсқа. Ол айналаны көріп, ақпаратты тікелей құлағыңызға сыбырлап отырады. Ал екіншісі - нағыз ғылыми-фантастика фильмдердегідей толыққанды AR-гарнитура. Бұл нұсқада барлық ақпарат, мәліметтер мен хабарламалар тікелей көз алдыңызға, дәлірек айтсақ, көз алмаңызға қарай проекцияланады.

Биыл күзде осы технологиялық ғажайыптың алғашқы нұсқалары нарыққа шығады дейді. Әрине, темір-терсектің "миы" - өзіміз білетін Gemini жасанды интеллектісі болмақ. Оны дауыспен іске қосуға болады, бірақ оның басты ерекшелігі - сіздің қайда қарап тұрғаныңызды аңдып, кешіріңіз, мұқият бақылап отыратынында. Project Astra негізінде жұмыс істейтін бұл жүйе көз алдыңыздағы мейрамхананың мәзірі мен рейтиңгін шығарып, жол белгілерін танып, тіпті кез келген ғимарат немесе зат туралы лезде шағын «Википедия» оқып бере алады. Бұл ретте құрылғыға артық сұрақ қоюдың да қажеті шамалы, өзі назарыңыздың қайда бағытталғанын өзі-ақ түсінеді.

Навигация мәселесі де жаңа деңгейге шықпақ. Қолыңыздағы смартфонға үңіліп, бағанаға соғылып қалатын немесе бұрылыстан өтіп кететін кездер артта қалатын сияқты. Баратын жеріңізді айтсаңыз болды, бағыт-бағдарды көрсететін виртуалды нұсқаулық, бағдаршалар мен сызықтар тура көз алдыңызда, асфальттың үстінде жарқырап тұрады. Әрине, мұның бәрі қағаз жүзінде әрі әдемі презентацияларда өте керемет, мінсіз көрінеді. Бірақ күнделікті өмірде көзілдіріктер экожүйемізді шынымен жеңілдете ме, әлде көшеде өз-өзімен сөйлесіп, ауадағы көрінбейтін түймелерді басқан «біртүрлі» адамдардың санын еселеп көбейте ме, оны уақыт көрсетеді. Әзірге анығы сол: технология алыптары біздің назарымызды (және ақшамызды) жаулап алудың жаңа, әрі өте визуалды тәсілін ойлап тапты.