Суға кеткен 69 бала: Тілсіз жау кінәлі ме, әлде ата-ананың салғырттығы ма?
Күн ысыды деп бала-шағаңызды ертіп, су жағасына демалуға асығып жүрсіз бе? Тоқтай тұрыңыз! Дәл қазір еліміздің су айдындарында адам нанғысыз жағдай болып жатыр. Шомылу маусымы жаңа ғана басталғанына қарамастан, 69 бірдей періштенің өмірі үзілді... Ең сұмдығы не, білесіз бе? Олардың басым көпшілігінің тілсіз жаудың құрбаны болуына... жанындағы ересектердің, тіпті өз ата-аналарының немқұрайлылығы себеп болған! Су жағасындағы ішімдік, қараусыз қалған балалар, түбінде не жатқаны белгісіз жабайы жағажайлар... Ішкі істер министрлігі барша қазақстандықтарға шұғыл әрі аса маңызды үндеу жасап отыр. Егер балаңыздың өмірі сіз үшін қымбат болса, полиция айтқан мына 4 қатаң ережені жаттап алыңыз!
Ішкі істер министрлігі ата-аналарды су жағасындағы демалыс кезінде балаларды бақылауды күшейтуге шақырды. Ведомство мәліметінше, шомылу маусымы басталғалы еліміздің су айдындарында 69 бала көз жұмған, деп хабарлайды Polisia.kz.
– Құрметті ата-аналар! «Заң және Тәртіп» қағидатын іске асыру аясында Ішкі істер министрлігі жазатайым оқиғаларға талдау жүргізді. Әсіресе, су айдындарында балалардың қаза табуы ерекше алаңдаушылық тудырып отыр. Күн ысығанда көптеген баланың өзен-көлдерде уақыт өткізетіні жасырын емес. Шомылу маусымы басталғалы су айдындарында қазірдің өзінде 69 бала суға кетті.
Қайғылы жағдайлар көбіне арнайы жабдықталмаған жерлерде шомылу салдарынан болады. Балалар жиі түбі тексерілмеген, су иірімі мен қатты ағысы бар рұқсат етілмеген жағажайларда суға түседі. Бұдан бөлек, демалыс кезінде ересектердің ішімдікке салынуы да қайғылы жағдайларға әкеп соғады. Салдарынан су жағасындағы балалар ересектердің тиісті назарынсыз қалады.
Қолданыстағы заңнамаға сәйкес, тыйым салынған жерлерде шомылғаны үшін әкімшілік жауапкершілік (ӘҚБтК-нің 364-бабы) қарастырылғанын еске саламыз. Жыл басынан бері осы бап бойынша 2700-ден астам құқық бұзушы жауапқа тартылды.
Осыған орай, ІІМ қарапайым қауіпсіздік ережелерін қатаң сақтауға шақырады:
Суға түсуге арналмаған, рұқсат етілмеген жерлерде шомылмау;
Су жағасында демалғанда балаларды мүлдем қараусыз қалдырмай, үнемі назарда ұстау;
Балаларға бейтаныс судың қауіпті екенін (түбінде тас немесе қоқыс, қатты ағыс пен жасырын су иірімі болуы мүмкін екенін) түсіндіру;
Аптап ыстықта суық суға бірден түспеу. Температураның күрт өзгеруінен қан тамырлары жиырылып, сіңір тартылуы (құрысу) мүмкін.
– Құрметті ата-аналар, өзіңізді және жақындарыңызды сақтаңыз, балаларымыздың қауіпсіздігін бірге қамтамасыз етейік! – деп атап өтті ІІМ Профилактикалық қызметті үйлестіру комитетінің төрағасы Арман Саданов.
Пікірлер
Әзірге пікір жоқ. Алғашқы пікірді қалдырыңыз!
