Смарт-сағаттардың орнын сақина баса ма? Casio-ның 90-жылдар стиліндегі жаңа тәжірибесі

Технология мен өткен күнге деген сағыныш бір арнада тоғысты! Casio компаниясы ретро-дизайн мен заманауи фитнес-трекерді біріктірген жаңа CRW-H001M-8 гибридті құрылғысын көпшілік назарына ұсынды. Көз алдыңызға аты аңызға айналған, балалық шағымыздағы электронды сағаттың миниатюралық нұсқасын елестетіңізші. Иә, енді ол білекте емес, тікелей саусақта жарқырап тұрады.

Сырттай қарағанда кәдімгі винтажды аксессуарға ұқсайтын гаджет уақытты, секундмерді және күнтізбені көрсетіп қана қоймайды. Кішкентай корпустың ішінде нағыз денсаулық сақшысы жасырылған. Оптикалық датчиктің көмегімен жаңа құрылғы жүрек соғысын, қандағы оттегі деңгейін, дене температурасын және ұйқы сапасын мұқият бақылай алады. Сонымен қатар, қадам саны мен жағылған калорияны да дәл есептеп береді. Ал бір реттік қуаты 4-6 күнге еркін жетеді.

Қазіргі нарықтағы Oura сияқты алып металл сақиналардың фонында жапондық брендтің жаңалығы бірден көзге түседі. Ол өзінің ретро-футуристік стилімен, әйгілі G-Shock сағаттарының рухын сақтай отырып, қарапайым гаджеттен гөрі нағыз трендке айналатын стильді детальға ұқсайды. Жалпы, өндіруші осыған дейін де сақина-сағаттар шығарып, талай тәжірибе жасаған еді. Алайда, дәл қазіргі модель ескі дизайнды заманауи биометриялық датчиктермен байытып, кәдімгі ойыншықты толыққанды денсаулық мониторингі құралына айналдырып отыр.

Жаңа туынды ең алдымен Қытай нарығына жол тартты. Ондағы бағасы шамамен 294 долларды құрайды. Гаджеттің басқа елдерде қашан сатылымға шығатыны әзірге белгісіз, бірақ ерекше гибридке деген қызығушылық қазірдің өзінде өте жоғары деңгейде.