Отандастар қоры осы уақытқа дейін не тындырды?

Сыртқы істер министрлігінің жанындағы Қоғамдық кеңес шетелдегі қандастарымыз бен отандастарымызға қандай жағдай жасалып жатқанын талқылады. Басты назарда – ұлтты ұйыстыруды мақсат еткен «Отандастар қорының» атқарған жұмысы мен алдағы ауқымды жоспарлары.

Қордың вице-президенті Әлібек Жұрқадамның мәліметінше, ұйым әлемнің 30-дан астам еліндегі 160-қа жуық қазақ мәдени орталықтарымен тығыз байланыс орнатқан. Олар тек мәдени шаралармен шектеліп қоймай, қандастардың құқықтық, әлеуметтік мәселелерін шешуге де белсенді атсалысуда.

Қор осы уақытқа дейін не тындырды?

• «Отандастарды ақпараттық қолдау орталығы» арқылы 35 мыңға жуық адам көші-қон, білім алу, құжат рәсімдеу және азаматтық алу мәселелері бойынша кеңес алған.

• Қор ұйымдастырған түрлі форумдар, кіші құрылтайлар мен концерттерге шетелде жүрген 40 мыңға жуық қандасымыз қатысқан.

• Қазақ тілін үйрету мақсатында 2 мыңнан аса онлайн сабақ өтіп, 4 мыңдай адам ана тілін меңгеру курстарын тәмамдады.

• Соңғы төрт жылда «Жас Қазақ» жазғы этно-лагеріне шетелден 637 қазақ баласы келіп, тарихи Отанымен танысып қайтты.

• Қазіргі таңда Қазақстанның жоғары оқу орындарында 5 мыңнан астам қандас студент білім алып жатыр.

• Әлеуметтік желілердегі қор парақшаларының аудиториясы 3 миллион адамға жетті. Ал «Ұлы дала» жобасы аясында шетелдік қазақ қаламгерлерінің 28 кітабы жарық көрді.

Қоғамдық кеңес мүшелері жұмыстарды одан әрі жетілдіру үшін бірнеше тың идея тастады. Олардың қатарында өңірлерде қандастарға арналған қызмет көрсету орталықтарын (фронт-кеңселер) көбейту, бұрынғы танымал «Отандастар» журналын қайта жарыққа шығару бар. Сонымен қатар, шетелде табысты еңбек етіп жүрген қазақ ғалымдарымен тұрақты кездесулер ұйымдастыру қажеттігі айтылды.

Жиынды қорытындылаған профессор Мұхит-Ардагер Сыдықназаров «Отандастар қорының» жұмысына оң баға беріп, бұл игі істерді халыққа, әсіресе медиа мен цифрлық платформалар арқылы кеңінен насихаттау керектігін баса айтты. Барлық құнды ұсыныстар хаттамаға түсіп, алдағы жұмыс жоспарына енгізілді.