Mitsubishi айына 1000 робот-жұмысшы шығаратын зауытты іске қоспақ
Mitsubishi компаниясы кадр тапшылығын түбегейлі шешу мақсатында Киотодағы зауытында айына 1000 ақылды робот-андроид шығаратын өндіріс желісін іске қосып, әлемдік индустрияда нағыз төңкеріс жасауға дайындалып жатыр.
Болашақ келді, ал темір жұмысшылар кәдімгі адамдармен иық тіресе еңбек етуге дайындалып жатыр! Жапониялық алпауыт Mitsubishi компаниясы Киото қаласындағы зауытында ақылды робот-андроидтардың жаппай өндірісіне кірісетінін мәлімдеді. Мақсат айқын — осыған дейін мотор жинауға арналған желіні толықтай қайта жабдықтап, 2027 жылдың басында айына 1000 робот шығару деңгейіне жету. Ауқымды бастамадағы негізгі серіктес тізгінін токиолық Highlanders Inc. компаниясы өз қолына алды.
Жасанды интеллектпен қаруланған көмекшілер бірден сатылымға шықпайды. Алдымен олар Mitsubishi-дің төл өндірістік желілерінде қызметке кірісіп, алгоритмдерін барынша жетілдіру мақсатында қажетті ақпарат жинайды. Сынақ кезеңі сәтті аяқталған соң ғана, жапондық өндіруші дайын өнімді ашық нарыққа шығарып, жұмыс күші тапшылығынан қиналып отырған өзге де кәсіпорындарға таптырмас көмекші ретінде ұсынбақ. Жалпы, мұндай батыл қадам кадр мәселесін шешіп, өндіріс қарқынын еселеуге ұмтылған әлемдік автоөндірушілер арасындағы жаңа трендті айқын көрсетеді.
HL Human атауын алған негізгі модель алғаш рет 2025 жылы көпшілік назарына ұсынылған еді. Прототип 19 түрлі бағытта қозғала алатын еркіндік дәрежесімен және өте күрделі әрекеттерді мүлтіксіз орындауға мүмкіндік беретін қуатты электрлік жетектермен жабдықталған. Жақында жарық көретін жаңа нұсқалар салмағы үш келіге дейінгі заттарды еркін ұстай алатын толыққанды бес саусақты қолға ие болады. Highlanders жасап шығарған бірегей бағдарламалық платформаның арқасында андроидтар адам сөзін ұғынып, қоршаған ортаны сараптайды және кез келген тапсырманы адамның қатысуынсыз-ақ жоғары деңгейде атқарып шығады.
Пікірлер
Әзірге пікір жоқ. Алғашқы пікірді қалдырыңыз!
