Misaligned фильмі кино әлемін неліктен қорқытып отыр?

2025 жылдың соңында Голливуд пен бүкіл киноиндустрияда үлкен дау тудырған жасанды интеллект "актері" Тилли Норвуд өзінің алғашқы толықметражды фильміне түскелі жатыр деп жазды - variety.com сайты.

Тиллидің авторы саналатын "Particle 6" студиясы ұсынған "Misaligned" ("Сәйкессіздік") атты жаңа комедиялық драма жасанды интеллекттің экзистенциалды хаосымен ұштасқан есею тарихын баяндайды. Картина бұлтты кеңістікте орналасқан "Тиллиғалам" (Tillyverse) деп аталатын сюрреалды цифрлық әлемде өрбиді. Басты кейіпкердің нақты денесі, балалық шағы немесе жеке өмірлік тәжірибесі жоқ, ол тек өзгелердің басынан өткенінің бәріне қол жеткізе алады. Оқиға желісі даркнеттен шыққан еліктіргіш боттың Тиллиді қауіпсіздік шектеулерінен бас тартып, адамға тән қалаулар мен амбицияларды дамытуға көндіруімен күрт шиеленісе түседі.

Аталған жоба "Particle 6" компаниясының жасанды интеллект негізіндегі алғашқы толықметражды туындысы болмақ. Студия өкілдерінің айтуынша, картина дәстүрлі кино мамандары мен технология саласындағы сарапшылардың бірлескен гибридті өнімі ретінде әзірленіп жатыр. Түсірілім барысында режиссерлер, сценаристер мен монтажшылар жаңашыл мамандармен тізе қоса еңбек етіп, өндіріс процесінде нейрожеліні оқыту мен тәлімгерлік бағыты да тікелей қамтылатыны айтылды.

Студияның бас директоры әрі негізін қалаушы Элин ван дер Велден биылғы жұмыстары көптен күткен болжамдарын растағанын мәлімдеді. Оның сөзінше, нейрожелілер жоғары сапалы нарративті кино жасауға көмектесе алады, алайда ол үшін адамның орасан зор еңбегі, шеберлігі, парасаты мен уақыты қажет. Басшы бұл жағдайды технологияның кемшілігі емес, оның басты ерекшелігі деп бағалайды. Алдағы онжылдықта өз ісінің шебері атанған кинематографистер жаңа құралдармен жұмыс істей отырып, оқиғаны баяндаудың терең түйсігін көрсете алатынына сенімді. "Misaligned" жобасы дәл осы тәжірибені толықметражды ауқымда жүзеге асыратын алаңға айналмақ.

Жаңа фильм туралы ақпарат Тилли Норвудтың киноиндустриядағы үлкен жанжалдың нысанасына айналғанына бір жыл толмай жатып жарияланып отыр. Ол кезде Элин ван дер Велден цифрлық туындының агенттікпен келісімшартқа отыратынын мәлімдеп, кәсіподақтар, актерлер мен режиссерлер тарапынан қатаң сынға ұшыраған еді. Сол оқиғадан кейін Тилли шығармашылық ортадағы жасанды интеллектке деген үрейдің танымал бейнесіне айналып, оның авторлары түрлі арандатушылық әлеуметтік желі жазбалары арқылы бұл атаққа көбірек дем берді.

Элин ван дер Велден жаңа туындының күлкілі, хаосты әрі өзін-өзі танитын "нағыз Тилли стилінде" болатынын жеткізді. Сонымен қатар, комедиялық сипаттың астарында бірегейлік, өнер көрсету және адамзаттың технология алдындағы қорқынышы сияқты терең тақырыптар жатқанын, өнердің өмірді сөзсіз қайталайтынын атап өтті. Қазіргі таңда "Misaligned" жобасы ерте әзірлеу сатысында тұр және негізгі серіктестермен келіссөздер жүргізілуде. Фильм студияның басқа да телевизиялық, коммерциялық және жарнамалық жобаларымен қатар өндіріске енетін болады.