Қытайлық дәрігер ChatGPT көмегімен 20 жыл бойы шешілмеген математикалық гипотезаны дәлелдеді

Әлемдік математика қауымдастығында нағыз сенсация болды. Қытайлық қарапайым дәрігер Цзинь Шаньму ширек ғасырға жуық уақыт бойы ең мықты ғалымдардың тісі батпай келген күрделі математикалық проблеманы шешіп шықты. Ең қызығы, бұл істе оған OpenAI компаниясының соңғы үлгідегі ChatGPT чат-боты қолғабыс еткен.

Доктор Цзиньнің бұл жетістікке жету жолы ерекше. Оның негізгі мамандығы математика емес. Бакалаврды геология саласында тәмәмдаған ол, кейін медициналық білім алып, миды ультрадыбыстық сканерлеу зерттеулерімен айналысқан. Өз жұмысында жасанды интеллект (ЖИ) мүмкіндіктерін қолдану барысында дәрігер күрделі математикалық есепке тап болады. Тәуекелге бел байлаған ол түйінді чат-боттың көмегімен шешіп көруді ұйғарады.

Әңгіме шамамен 20 жыл бұрын француз математигі М. Крузе ұсынған гипотеза туралы болып отыр. Бұл теория деректерді өңдеу мен сызықтық теңдеулерді шешуде жиі қолданылатын «матрицаларға» (сандар кестесі) қатысты. Формулировкасы тым абстрактілі көрінгенімен, бұл проблема ұзақ уақыт бойы математиктер үшін үлкен кедергі болып келген еді.

Цзинь Шаньму арнайы математикалық білімі болмаса да, ЖИ-ді күрделі теоремаларды үйрену мен дәлелдеу құралы ретінде шебер пайдалана білді. Ол өзінің дәлелдемесін дайындап, ғалымдар назарына ұсынды.

Оқиғаның тағы бір қызықты тұсы бар. Корнелл университетінің профессоры Таунсенд те гипотезаны GPT арқылы тексермек болған екен. Бірақ чат-бот оған есептің үш күн бұрын ғана шешіліп қойғанын хабарлайды. Профессор Цзиньнің жұмысымен танысқан соң, оның дұрыстығына көз жеткізді.

Ақырында, қолжазбаны гипотезаның авторы М. Крузенің өзі тексеріп, дәлелдеменің толықтай дұрыс екенін ресми түрде мойындады.

South China Morning Post басылымы хабарлағандай, заманауи ЖИ модельдерінің тек күнделікті қарапайым тапсырмаларды орындап қана қоймай, іргелі ғылыми жаңалықтар ашуға да қауқарлы екенін тағы бір мәрте дәлелдеп берді.