Қытайда әлемдегі алғашқы «Терминаторлар» жекпе-жегі өтті

Фантастикалық фильмдердегі темір машиналарының аяусыз шайқасы енді Голливуд режиссерлерінің қиялынан шығып, шынайы өмірге қадам басты. Қытайдың технологиялық астанасы саналатын Шэньчжэньде әлемдегі ең алғашқы гуманоид роботтар арасындағы еркін жекпе-жек турнирі мәресіне жетті. Бұл жай ғана темір мен пластиктің қақтығысы емес, жасанды интеллекттің төзімділігі мен болашақтағы мүмкіндіктерін айқындайтын ауқымды сынақ болды.

Турнир барысында оқырманды да, көрерменді де таңғалдырған сәттер аз болған жоқ. Роботтар тек қолмен немесе аяқпен соққы жасап қана қоймай, шабуылдан адамша жалтаруды, тіпті ауыр соққыдан сұлап түскеннен кейін тепе-теңдікті қайта қалпына келтіріп, орындарынан тұруды көрсетті. Ең таңғаларлығы — кейбір машиналар ауыр соққының салдарынан басынан айырылып қалғанына қарамастан, шайқасты тоқтатпай, бағдарламаланған тапсырманы соңына дейін орындауға ұмтылған. Бұл көрініс бір жағынан үрейлі көрінгенімен, екінші жағынан заманауи инженерияның қаншалықты алға кеткенін, жүйенің автономды өміршеңдігін толықтай дәлелдеп берді.

Бұл ерекше сайысты ұйымдастыруды EngineAI компаниясы өз мойнына алған. Жекпе-жекке барлығы 32 команда қатысып, бақ сынады. Мұндағы ең басты ерекшелік — қатысушылардың барлығы бірыңғай стандартталған T800 платформасына негізделген боттарды басқарды. Ұйымдастырушылардың бұл қадамы өте қисынды әрі ұтымды болды: бірыңғай платформа шағын стартаптар мен зерттеушілер үшін жарысқа қатысу табалдырығын барынша төмендетіп, ғылым мен бизнестің ортақ мақсатта бірігуіне тамаша жағдай жасап берді.

Жекпе-жекке шыққан әрбір андроиндтің сырт келбеті мен ішкі құрылысы нағыз жауынгерлік машинаны елестетеді. Бойы 1,73 метр, ал салмағы 75 келі болатын бұл роботтар нағыз орта салмақтағы спортшының параметріне ие. Олардың корпусы аса берік авиациялық алюминийден құйылған, яғни ауыр соққылар мен құлауларға еш қиындықсыз төтеп бере алады.

Дегенмен, T800-дің басты ерекшелігі оның темірінде емес, қозғалыс икемділігінде жатыр. Жиырма тоғыз еркіндік дәрежесіне ие бұл машиналар адам сенгісіз күрделі акробатикалық трюктер жасай алады. Ал аяқтарын белсенді салқындату жүйесі мен қатты денелі қуатты батарея роботқа төрт сағатқа дейін тоқтаусыз, интенсивті жұмыс істеуге мүмкіндік береді. Қозғалтқыштардың айналу моменті шамамен 450 Н⋅м жетеді — бұл кез келген қарсыласты орнынан ұшырып түсіруге жететін орасан зор күш.

Соққыны дәл бағыттау және уақытылы қорғану үшін роботқа мінсіз көру және ойлау қабілеті қажет екені белгілі. Бұл ауыр жауапкершілікті кеңістікті 360 градусқа шолатын лидар мен навигацияға арналған жоғары дәлдіктегі стереокамералар өз мойнына алған. Ал роботтың «миы» ретінде NVIDIA AGX Orin және Intel N97 процессорларына негізделген есептеу модулі орнатылған. Бұл жүйенің жасанды интеллект өнімділігі 275 TOPS деңгейінде. Қарапайым тілмен айтқанда, машина қарсыластың әрбір қимылын миллисекунд ішінде талдап, оған қарсы жылдам шешім қабылдап үлгереді.

Жарыстың ұйымдастыру комитеті турнирдің басты мақсаты — кімнің мықты екенін анықтау емес екенін баса айтты. Басты назар роботтардың соққы дәлдігін, физикалық тұрақтылығын, қорғаныс маневрлерін және нақты қақтығыс кезіндегі «өміршеңдігін» шынайы шарттарда сынауға аударылған. Бұл турнир Қытайдың гуманоид роботтарды дамыту мен оларды практикалық сынақтан өткізудегі ауқымды стратегиялық қадамының бір бөлшегі ғана.

Сарапшылар бұл бағытқа үлкен үмітпен, әрі кішкене сақтықпен де қарайды. Олардың пікірінше, роботтарды жекпе-жекке бейімдеу әзірлеушілерді басты мақсаттан тайдырмауы тиіс. Мұндай күрделі динамикалық қабылдау мен амортизация жүйелері бар роботтарды жасаудағы түпкі мақсат — оларды тек рингтегі төбелес үшін емес, адамға көмекші ету. Машиналардың соққыға төтеп беріп, тепе-теңдікті сақтауды үйренуі болашақта олардың күрделі логистикалық қоймаларда, ауыр өнеркәсіп орындарында, тіпті төтенше жағдайлардағы құтқару жұмыстарында мүлтіксіз қызмет етуіне негіз болмақ.

Бәлкім, бүгін біз Шэньчжэнь рингінде бір-бірін аяусыз ұрған темір машиналарды көріп отырған шығармыз. Бірақ ертең дәл осы технологиялар құлаған ғимараттардың астынан адамдарды алып шығуға, қонақүй бизнесінде мінсіз қызмет көрсетуге немесе қауіпті өндірісте адам өмірін сақтап қалуға қызмет етуі әбден мүмкін. Кибер-гладиаторлар дәуірі басталды, ал оның адамзатқа әкелер пайдасының ауқымын біз енді ғана түсініп келеміз.