Қытай мен АҚШ ғалымдарының жаңа жобасы: Балықшы өрмекшінің қимылына негізделген робот сынақтан өтті

Қытай мен АҚШ робототехниктері бірлесіп жасаған «QuadBoat» жобасы алғашқы сынақтан сәтті өтті. Бұл – су бетінде жүгіріп, жемтігін сүңгімей-ақ ұстайтын балықшы өрмекшінің қимылына негізделіп жасалған жаңа құтқарушы-робот. Егер жоба толықтай сәтті аяқталса, әлем суға кеткен адамды өздігінен тауып, құтқарып қалатын су жаңа автономды аппаратқа қол жеткізбек.

Теңіздегі құтқару операцияларының басты қиындығы сол – суға батып бара жатқан адам үшін әрбір секунд санаулы, уақыт өткен сайын өлім қаупі арта түседі. Сондықтан адамды жедел тауып қана қоймай, оны судан дереу алып шығу өте маңызды. Қазіргі әуе және су бетіндегі дрондар тек іздеп табу міндетін ғана атқара алады. Ал зардап шегушіні судан тартып шығару тіпті кәсіби құтқарушыларға да оңайға соқпайды. Өйткені құтқару қайықтарының құрылымы әрдайым қолайлы бола бермейді, оның үстіне су жұтып, әбден қалжыраған адам құтқарушыларға еш көмектесе алмайды.

Дәл осы мәселені шешу үшін жасалған QuadBoat роботының үлкен қалтқылары (поплавок) бар төрт тәуелсіз аяғы бар. Ол аппараттың ауыр жүкпен бірге су бетінде батпай, еркін қозғалуын қамтамасыз етеді. Кері кинематика контроллері мен болжамды басқару моделі аяқтардың қозғалысын дәлдікпен реттеп, роботқа кез келген жағдайда тепе-теңдікті сақтауға көмектеседі. Осының арқасында робот су бетінде жай ғана жүзіп қоймай, дәл өрмекші сияқты нысананың дәл үстіне барып, адамды судан еш қиындықсыз көтеріп ала алады.

Әзірге QuadBoat тек су бетінде қозғалуды ғана меңгерді. Келесі кезеңде ғалымдар оған нысананы іздеп табу, оны тану және онымен байланысқа шығу алгоритмдерін үйретпек. Әзірге барлық сынақтар тыныш суда, яғни бассейнде өтіп жатыр. Ал роботтың ашық теңіздегі асау толқындарда өзін қалай ұстайтыны – әлі де үлкен сұрақ. Дегенмен, бұл құтқару операцияларының басқа да маңызды факторларын зерттеу сияқты болашақтың еншісіндегі басты міндеттердің бірі болмақ.