Қытай әлемдегі алғашқы «робот-кентаврларды» жаппай өндіріске шығарды
Жарылыстан қорықпайды, 210 келіні емін-еркін көтереді: Run Robotics компаниясы жасап шығарған ерекше «кентавр» роботының басты құпиясы неде және оған неге қазірден бастап кезекке тұрып жатыр?
Шанхайда өткен WAIC 2026 көрмесінде қытайлық Run Robotics компаниясы нағыз фурор жасады! Олар ғылыми-фантастикалық фильмдерден шыққандай әлемдегі тұңғыш гибридті «робот-кентаврды» көпшілікке таныстырды. Бұл жай ғана темір емес — астыңғы жағы кез келген ойлы-қырлы жермен жүйіткіп өтетін төрт дөңгелекті талғажаусыз көлік болса, үстіңгі жағы кәдімгі адам сияқты екі қолымен ең күрделі жұмыстарды атқаратын нағыз трансформер!
Бұл темір «кентаврды» жай ғана кеңседегі жұмысқа емес, нағыз тозаққа жіберу үшін жасаған. Ол жарылыс қаупі бар аймақтарда қорықпай жүре береді, өрт сөндіреді, терең шахталар мен мұнай мұнараларында патрульдік жасайды, тіпті қираған ғимараттардың үйіндісін аршып, адамдарды құтқарады. Күші де сұмдық: қалыпты жағдайда 120 келіні емін-еркін көтерсе, бір орнында тұрып 210 келілік салмаққа сыр бермейді!
Роботтың басы мен «қолдары» нағыз смарт-жүйелермен ұштасқан. Лидар, 3D камералар және бинокулярлық көру қабілеті арқылы ол құбырларды, бұрандаларды, адамдарды немесе кедергілерді дәл таниды. Адамнан бұйрық күтіп телміріп тұрмайды — өз бағытын өзі жоспарлап, ситуацияға қарай көз ілеспес жылдамдықпен шешім қабылдай алады. Оған қоса, тапсырмаға қарай роботтың «қолдарын» немесе бөлшектерін лезде басқасына ауыстыра салуға болады.
Қытайлықтар мұнымен тоқтап қалмақ емес. Run Robotics 2026 жылдың төртінші тоқсанында осы роботтарды толассыз шығаратын тұтас автоматтандырылған зауыт желісін іске қоспақ. Тіпті қазірдің өзінде бұл «кентаврларға» кезекке тұрып, миллиондаған тапсырыс беріп қойғандар жетерлік.
Пікірлер
Әзірге пікір жоқ. Алғашқы пікірді қалдырыңыз!
