Қазақстандық инженертiң стартапы $5,4 миллиардқа бағаланды
Intel мен Goldman Sachs сияқты алыптар миллиондаған доллар инвестиция құйған жобаның артында қазақстандық маман тұр. Бүгінде 238 мемлекеттің тұрғындары қолданатын бұл платформа визуалды контент өндірісінде нағыз төңкеріс жасап жатыр. Қазақ ақылынан туған өнім жаһандық трендті қалай басқарып отыр және оның келесі қадамы қандай болмақ?
Қазақстандық кәсіпкерлер негізін қалаған жасанды интеллект (ЖИ) саласындағы Higgsfield стартапы жаңа инвестициялық раундта $400 миллион қаржы тартты. Осы мәміленің нәтижесінде компанияның нарықтық құны $5,4 миллиардқа жетіп отыр. Бұл туралы беделді Financial Times басылымы хабарлады деп жазды - 7kun.kz сайты.
Технологиялық алпауыттардың назарын аударған бұл раундқа DST Global, Goldman Sachs, Liberty Global, Intel және тағы басқа бірқатар халықаралық инвестициялық қорлар қатысқан. Тартылған қыруар қаражат енді корпоративтік өнімдерді дамытуға, қауіпсіздік жүйелерін күшейтіп, есептеу қуатын арттыруға жұмсалмақ.
Higgsfield-тің нарықтағы бағасы небәрі бірнеше айдың ішінде еселеп өсті. Осы жылдың басында ғана стартап $80 млн инвестиция тартып, жалпы құны $1,3 млрд деп бағаланған болатын. Енді, міне, бұл көрсеткіш төрт есеге жуық ұлғайып, $5,4 миллиардқа жетті.
Компанияның қаржылық көрсеткіштері де таңғаларлық қарқынмен өсіп келеді. Financial Times дерегіне сүйенсек, 2026 жылдың тамыз айындағы жағдай бойынша Higgsfield-тің жылдық табыс көрсеткіші $700 миллионға жеткен. Салыстыру үшін айтсақ, бір жыл бұрын бұл сома небәрі $20 миллион төңірегінде еді. Қазіргі таңда бұл нейрожеліні әлемнің 238 еліндегі 30 миллионнан астам адам күнделікті тұтынады.
Соңғы уақытта Higgsfield жекелеген контентмейкерлерден гөрі ірі корпоративтік секторға басымдық бере бастады. Компания негізін қалаушылардың бірі Алекс Машрабовтың айтуынша, қазіргі табыстың басым бөлігі нақ осы бизнес-клиенттерден түсіп жатыр. Ал жыл басында ғана B2B (бизнестен бизнеске) бағытындағы клиенттердің үлесі 25%-ға да жетпейтін.
Higgsfield деген не және оны кімдер құрды?
Бұл жоба – генеративті жасанды интеллект арқылы видео және визуалды контент жасауға арналған заманауи құрал. Платформа нейрожелінің көмегімен сурет пен видео жасап қана қоймай, оларды өңдеуді, маркетинг пен SMM-ге қажетті визуалды өндірісті толық автоматтандыруды ұсынады.
Жобаның басында қазақстандық AI-инженер Ерзат Дулат пен Алекс Машрабов тұр. Машрабов бұған дейін әйгілі Snap компаниясында Generative AI бағытын басқарған әрі 2020 жылы дәл сол Snap 166 миллион долларға сатып алған AI Factory стартапының негізін қалаушылардың бірі.
Жаңа инвестициялық бағалаудан кейін Higgsfield Қазақстанмен тікелей байланысы бар ең қымбат технологиялық стартаптардың біріне айналып отыр.
Пікірлер
Әзірге пікір жоқ. Алғашқы пікірді қалдырыңыз!
