Қазақстанда алғашқы криптоматтар пайда болады: Ұлттық банк тарихи лицензия берді

Криптовалюта нарығы біздің күнделікті өмірімізге дендеп еніп келеді. Бұрын цифрлық активтермен жұмыс істеудің бұлыңғыр тұстары көп болғандықтан, көпшілік бұл салаға үрке қарайтын еді. Алайда, қазақстандық онлайн-инвестициялау мен цифрлық қаржы нарығында тарихи жаңалық орын алды: жағдай түбегейлі өзгермек.

Елімізде крипто айырбастайтын алғашқы ресми компания пайда болды дейді - ҚАРЖЫЛЫҚ САУАТ арнасы.

Қазақстан Республикасының Ұлттық банкі өз тарихында алғаш рет осындай қызметке лицензия берді. Тарихи құжатқа елордалық Pax Finance компаниясы ие болды.

Қарапайым халыққа мұның қандай пайдасы бар?

Бұл жаңалықтың цифрлық активтерге қызығушылық танытатын кез келген азамат үшін берер артықшылықтары өте көп. Нақтырақ тоқталсақ:

• Офлайн криптомат пен кеңселер: Енді аталмыш компания криптовалютаны заңды түрде сатып алуға және сатуға арналған арнайы офлайн кеңселер ашып, қала көшелері мен сауда орындарында криптоматтар орната алады. Бұрын мұндай операциялар тек Астана халықаралық қаржы орталығы (АХҚО) сияқты арнайы аймақтарда ғана жасалса, енді қалың бұқараға барынша қолжетімді болады.

• Алаяқтарсыз, қауіпсіз қолма-қол ақшаға айналдыру: Бұдан былай криптовалютаны күнделікті теңгеге айналдыру өте оңай әрі толықтай заңды болмақ. Жұртқа енді беймәлім, күмәнді сайттарға кіріп, алаяқтардың құрығына түсудің қажеті жоқ.

• Банктермен кедергісіз байланыс: Лицензиясы бар компаниялар еліміздің екінші деңгейлі банктерімен тығыз, ресми түрде жұмыс істейді. Бұл дегеніміз – ертеңгі күні криптодан тапқан табысыңызды өзіңіздің пластик картаңызға аударған кезде, банк «бұл күмәнді ақша» деп шотыңызды бұғаттап тастамайды. Барлық транзакцияның заңды көзі көрініп тұрады.

• Сенімді «криптоәмиян»: Азаматтардың цифрлық ақшасын сақтайтын криптоәмияндарды тек лицензиясы бар мекемелер ғана ашады. Тиісінше, компания сіздің қаржыңызды хакерлерден қорғауға және оның қауіпсіздігіне тікелей жауапты әрі мүдделі болады.

Ұлттық банк мұндай рұқсатты кімдерге береді?

Әрине, кез келген адам көшеден кеңсе жалдап алып, крипто саудасымен айналыса алмайды. Нарыққа кірудің талабы өте қатаң. Лицензия алу үшін үміткер компанияның:

• Киберқорғанысы мен күзет жүйесі мінсіз болуы;

• Хакерлік шабуылдарға төтеп бере алатын ең заманауи технологиялармен жабдықталуы;

• Қандай да бір форс-мажор жағдайында халықтың ақшасын толық өтеп бере алатын қомақты жеке капиталы болуы шарт.

Бұл жаңалық – цифрлық технологиялар мен инвестиция трендтерін жіті бақылайтындар үшін үлкен мүмкіндіктердің басы. Алдағы уақытта мұндай заңды компаниялардың қатары артатыны сөзсіз. Ең бастысы – криптовалютамен жұмыс істемес бұрын, таңдаған мекемеңіздің Ұлттық банктен алған ресми лицензиясын тексеріп алуды әдетке айналдырыңыз.