Қазақстан өзінің «Астана» автобустарын жасауды бастайды: 2027 жылы электроавтобустар қосылады
Толығымен Қазақстанда құрастырылатын әрі әлемдік стандартқа сай келетін «Астана» автобустарының сериялық өндірісі басталуға жақын қалды
Ауқымды жоба туралы Үкіметтің кезекті отырысында «Астана Моторс» компаниялар тобының басшысы Нұрлан Смағұлов мәлімдеді.
Жаңа қоғамдық көліктер толығымен Қазақстан аумағында құрастырылады. Жобаның ең басты ерекшелігі – көліктің сыртқы пішімі мен дизайнын жасауға қазақстандық инженерлер тікелей атсалысқан. Отандық мамандар мен қытайлық технологиялық серіктестердің бірлескен жұмысының нәтижесінде құрастырылатын автобустарда әлемдік көшбасшы өндірушілердің ең озық бөлшектері қолданылады.
«Кәсіпорынның алдағы уақыттағы басты стратегиялық жобаларының бірі – нарыққа «Астана» атты өз брендімізбен жаңа автобустар шығару. Біз бұл бағытта шетелдік тәжірибе мен отандық әлеуетті сәтті ұштастыра білдік», – деп атап өтті Нұрлан Смағұлов.
Өндіріс кезең-кезеңімен іске қосылмақ. Жоспар бойынша, алғашқы дизельді және газбен жүретін автобустардың сериялық өндірісі осы жылдың қараша айында басталады.
Ал еліміздің экологиялық бағытқа бет бұруы аясындағы басты жаңалық – «Астана» маркалы заманауи электр автобустарын шығару 2027 жылдың наурыз айына жоспарланып отыр.
Демек, жақын болашақта жолаушылар тасымалында отандық өнімнің үлесі артып, қала көшелерінде өзіміздің «Астана» автобустары қатынайтын күн алыс емес.
Пікірлер
Әзірге пікір жоқ. Алғашқы пікірді қалдырыңыз!
