Қазақстан енді OMODA мен JAECOO көліктерін құрастырады
OMODA және JAECOO енді Қазақстанда жиналады. Тоқаевтың Шанхайға сапарынан кейін отандық автокөлік нарығында қандай өзгеріс болады?
Президент Қасым-Жомарт Тоқаевтың Қытайға, оның ішінде Шанхай қаласына жасаған жұмыс сапары Қазақстанның автокөлік нарығы үшін тарихи жаңалықтармен есте қалды. Сапар аясында еліміздің автоөнеркәсібін жаңа деңгейге көтеретін аса маңызды құжаттарға қол қойылды.
Енді қазақстандықтар отандық зауыттардан шыққан су жаңа, әлемге танымал көліктерді тізгіндей алады. Атап айтқанда, «Allur» компаниясы мен қытайлық «Li Auto» корпорациясы арасында өнеркәсіптік ынтымақтастық туралы ірі келісім жасалды. Құжатқа сай, көп ұзамай Қазақстанда танымал Li Auto көліктерін өндіру жобасы қолға алынбақ.
«Astana Group» пен «Chery Holding Group» өзара келісімге келіп, «Astana Motors» зауытында заманауи OMODA және JAECOO брендтерінің көліктерін шығаруға арналған техникалық-лицензиялық құжатты бекітті. Бұл отандық нарықты сапалы әрі сұранысқа ие кроссоверлермен толықтыратыны сөзсіз.
Сонымен қатар, елімізде электр көліктерінің экожүйесін дамытуға да үлкен мән беріліп отыр. «Самұрық-Қазына» қоры, «Freedom Holding», Астана қаласының әкімдігі және «Geely Auto Group» бірігіп, электромобильдерге арналған инфрақұрылымды өркендетуге және автомобиль саласына жасанды интеллектіні енгізуге бағытталған ауқымды меморандумға қол қойды.
Жалпы алғанда, Мемлекет басшысының Шанхайға жұмыс сапары өте жемісті болды. Сапар барысында жалпы құны 15 миллиард доллардан асатын 70-тен астам коммерциялық келісім жасалып, ел экономикасына, соның ішінде көлік өндірісіне тың серпін берілді.
Пікірлер
Әзірге пікір жоқ. Алғашқы пікірді қалдырыңыз!
