Қазақстан атышулы «Дайвинчикке» тиым салды

Қазақстанда жастар мен жасөспірімдер арасында кеңінен таралған «Дайвинчик» Telegram-сервисінің жұмысына толықтай тыйым салынды. Tengrinews басылымының мәліметінше, мұндай қатаң шешімді Алматы қаласы Алатау аудандық соты прокурордың шағымы негізінде шығарған. Бұл жай ғана кезекті бұғаттау емес, артында үлкен қылмыстық іс жатқан күрделі мәселе.

Бұл шектеуге кәмелетке толмаған қыздың басынан өткен ауыр оқиға себеп болды. Алматы қаласы прокуратурасының мәліметіне сүйенсек, өткен жылдың қазан айында Алатау ауданының қадағалау органы сотқа арнайы қылмыстық іс жолдаған. Жәбірленуші жасөспірім аталмыш танысу чат-боты арқылы бейтаныс адаммен сөйлесіп, кездесуге барған. Алайда, виртуалды таныстықтың соңы қайғылы жағдайға ұласып, күдікті оған қатысты ауыр заңсыз әрекеттер жасаған.

Осы жаға ұстатарлық оқиғадан кейін құзырлы органдар «Дайвинчик» сервисін жіті тексеріп, оның ешқандай жас шектеуісіз жұмыс істейтінін анықтады. Яғни, кез келген бала еш кедергісіз тіркеліп, қауіпті адамдардың құрбаны болуы әбден мүмкін еді. Сондықтан прокуратура бұл каналдың қызметі балалардың қауіпсіздігіне тікелей қатер төндіреді деп танып, Қазақстан аумағында оның жұмысын тоқтату туралы сотқа талап-арыз түсірді. Нәтижесінде, сот бұл талапты толықтай қанағаттандырып, платформаны заңсыз деп таныды.

Айта кетерлігі, бұл танысу алаңының қауіптілігі тек Қазақстанда ғана емес, көршілес елдерде де әлдеқашан дәлелденіп үлгерген. Мәселен, Ресей соттары соңғы екі жыл ішінде осы сервис арқылы жасалған алаяқтық фактілері бойынша жиырмадан астам үкім шығарған. Ондағы қылмыстық схема өте қарапайым әрі қулыққа құрылған. Алаяқтар өздерін сұлу қыз ретінде таныстырып, желідегі жігіттердің сеніміне кіреді де, оларды түрлі жымысқы қылмыстық істерге тартып, торға түсірген.