iPhone 20 туралы құпия мәліметтер желіге тарап кетті

Технология әлемінде құпия ақпарат таратушы Джон Проссердің мәлімдемесінен кейін үлкен дүрбелең басталды. Айтуынша, 2027 жылы шығады деген мерейтойлық iPhone 20 үлгісінің алғашқы сипаттамасы белгілі болған. Желі қолданушылары мен Apple жанкүйерлері жаңалықты қызу талқылап жатыр. Бірақ ақпараттың қаншалықты шындыққа жанасатынын әрі артында қандай құпия тұрғанын сараптап көрейік.

Ең басты сыртқы өзгеріс - шеттері иілген экран. Apple компаниясы iPhone 12 үлгісінен бастап тегіс экрандарға көшіп, оны саналы таңдау деп түсіндірген еді. Тегіс шыны шағылыспайды, бұрыштарында сурет бұзылмайды, ал қорғаныс әйнегін кез келген адам оңай жабыстыра алады. Енді компания экран шетін сәл иіп жасау арқылы ережесін өзі бұзбақ. Android жүйесіндегі телефондардың «сарқырама» іспетті экрандары қолданушыларды кездейсоқ басылып кету мәселесімен жылдар бойы шаршатқаны белгілі. Apple бұл қателікті түсініп, шеттерін тым қатты қисайтпай, жаңа пішін ұсынуды көздеп отыр. Тұтынушылар қазірдің өзінде екіге бөлінді: бірі тұтас шыныдан жасалған телефонды армандаса, екіншілері желіде оның жерге бір түссе, жөндеу ақысы қанша боларын елестете де алмайтынын жазып, қауіптеніп отыр.

Ең қызығы, жарияланған алдын ала сызбаларда телефонның артында тек екі камера ғана көрсетілген. Соңғы озық үлгілерде үш камера қолданылатынын ескерсек, бұл жаңа пішін тек қымбат Pro нұсқаларына емес, барлық қарапайым iPhone 20 үлгілеріне ортақ болуы мүмкін. Сондай-ақ камерада күрделі әрі жарық нашар түсетін жағдайларда түсіру сапасын айтарлықтай жақсартатын жаңа технологияға негізделген негізгі линза пайда болады.

Ішкі техникалық өзгерістер де аз емес. Apple сыртқы өлшемдерді өзгертпей, батарея қуатын арттыру үшін дәстүрлі литий-ионды қуаттағыштардан бас тартып, кремний негізіндегі жаңа шешімге көшуді жоспарлар жатыр. Оған қоса, жаңа процессоры тек дәстүрлі зауыттарда ғана емес, Intel өндіріс орындарында да шығарылуы ықтимал. Бұған дейін тек қуатты компьютерлік желілерде қолданылып келген жоғары жылдамдықты жад енді телефонға кірістірілген жасанды интеллектінің жұмысын барынша тездетпек. Бұл технологияны ықшам құрылғыларға бейімдеп үлгерген Samsung компаниясы Apple-ге тек экран ғана емес, осы жадты да жеткізуші болуы ғажап емес.

Мерейтойлық телефонның айналасында неше түрлі алыпқашпа әңгіме тарап үлгерді. Олардың ішіндегі ең танымалы - Apple құрылғыға бейнені галограмма сияқты тікелей ауаға шығаратын жүйе орнатпақ екен. Осы идея әуесқойлардың басында бірнеше жылдан бері жүргенімен, оған ешқандай ресми дәлел жоқ. Сондай-ақ 1 шақырым тереңдікке дейін толық су өткізбейтін қасиет, бет-әлпетті танитын жүйеге қосымша ретінде экран астына саусақ ізін оқитын құрылғы орнату немесе мүлдем сызылмайтын жаңа құймадан жасалған корпус туралы да қауесет бар. Бірақ ешқайсысы шынайы дереккөздермен расталмаған.

Жаңа смартфонның таныстырылымына әлі бір жарым жылдай, яғни 2027 жылға дейін уақыт бар. Ал оған дейін, 2026 жылдың күзінде нарыққа iPhone 18 Pro шығуы тиіс. Apple компаниясының технологияны әбден мінсіз күйге жеткізбейінше жаппай өндіріске жібермейтін әдетін ескерсек, бұл жоспарлар алдағы уақытта әлі талай өзгеруі мүмкін.