Instagram 10 жылда алғаш рет бас логотипін өзгертті
Ең қызығы, бұл жай ғана редизайн емес, желідегі үлкен флешмобқа айналып кетті. Әлемдік ірі корпорациялар да дәл осы стильде өз атауларын жаза бастады. Тіпті OpenAI компаниясы да қалыс қалмай, ChatGPT парақшасында өз логотипінің «инстаграмдық» нұсқасын жариялап, трендке ілесіп кетті.
Әлемдегі ең танымал әлеуметтік желілердің бірі Instagram соңғы он жылда бірінші рет қосымшаның жоғарғы бөлігіндегі басты логотипін өзгертті. Жаңалықты компания басшысы Адам Моссери жеке парақшасында жариялап, көпшіліктің назарын бірден аударды. Айтуынша, басты жазудың дизайны ұзақ уақыт бойы жаңартылмағандықтан, оған заманауи леп қосу туралы шешім қабылданған. Дизайнерлер логотипті барынша таза әрі сәнді етіп жасағанымен, қосымшаның өзіне тән ерекшелігі мен бұрынғы нұсқаға деген құрметті сақтап қалған. Моссеридің жазбасы санаулы уақыт ішінде жүз мыңдаған лайк жинап, желідегі ең көп талқыланған тақырыптардың біріне айналды.
Жаңа дизайн желі қолданушыларының арасында екіұдай пікір тудырды. Басым көпшілігі жаңартуды жылы қабылдап, оның көз тартарлық заманауи көрінетінін жарыса жазуда. Тіпті, кейбір креативті қолданушылар логотиптің жаңа пішінін ягуардың сұлбасына теңеп үлгерді. Пікір қалдырушылар жаңа жазудың лаконизм мен ерекше мінезді ұштастыра білгенін атап өтіп, шешімді жоғары бағалады.
Алайда, редизайн бәрінің бірдей көңілінен шықты деуге болмайды. Дизайнның тым ерекшеленгені соншалық, кейбір адамдар жаңа шрифттен қателер іздей бастады. Мәселен, мұқият оқырмандар «r» әрпінің енді «z»-ке қатты ұқсап кеткенін байқаса, кейбіреулер қатар тұрған «n» мен «s» әріптерінің бір-бірімен тұтасып, көзбен қарағанда «m» болып оқылатынын айтып әзілдеуде.
Instagram-ның батыл қадамы тек қарапайым қолданушыларды ғана емес, ірі корпорацияларды да бейжай қалдырмады. Әлемдік компаниялар жаңа логотиптің стиліне еліктеп, өз атауларын дәл осы манерада жазып, әлеуметтік желілерде жаңа флешмобтың басталуына түрткі болды. Трендке жасанды интеллект саласының көшбасшысы OpenAI да қосылды. Олар ChatGPT аккаунтында өз логотиптерінің инстаграмдық стильдегі жаңа интерпретациясын жариялап, оқырмандарының қошеметіне бөленді.
Айта кетерлігі, логотиптің өзгеруі Instagram-ның кейінгі уақыттағы жалғыз жаңалығы емес. Осыған дейін маусым айында компания өз мүмкіндіктерін айтарлықтай кеңейтіп, Smart TV-ге арналған қосымшасын іске қосқанын мәлімдеген болатын. Ендігі кезекте қолданушылар сүйікті Reels роликтері мен Stories-терін тек телефонның кішкентай дисплейінен ғана емес, үлкен теледидар экранынан да тамашалай алады. Бұндай маңызды өзгерістер Instagram-ның жай ғана әлеуметтік желі емес, толыққанды мультимедиялық платформаға айналып жатқанын анық аңғартады.
Пікірлер
Әзірге пікір жоқ. Алғашқы пікірді қалдырыңыз!
