Honda нейрожеліні меңгерген мамандарының жалақысын өсірмек

Жапониялық «Honda Motor» корпорациясы қызметкерлер арасында жасанды интеллект (ЖИ) бойынша арнайы корпоративтік сертификаттау бағдарламасын іске қосты. Енді ЖИ құралдарын меңгерген мамандар өз білімін растай отырып, қомақты ақшалай сыйақы ала алады. Nikkei Asia басылымының хабарлауынша, компания осы арқылы күнделікті жұмыс процестеріне жасанды интеллектті енгізуді жеделдетпек.

Бағдарлама үш деңгейлі сертификаттаудан тұрады. Олардың әрқайсысын алу үшін қызметкерлер жазбаша емтихан тапсырып, сұхбаттан өтуі тиіс. Сынақ барысында маманның технологияны қаншалықты білетіні ғана емес, оны іс жүзінде, яғни жұмыс барысында қалай қолдана алатыны да бағаланады. Сертификаттаудан сәтті өткен қызметкердің жалақысына ай сайын 150 мың иенге (шамамен 450 мың теңгеге) дейін үстемеақы қосылады.

Әзірге Honda-ның 45 мың қызметкерінің 280-ге жуығы ғана жаңа ЖИ-сертификатын алған. Оның ішінде ең жоғары үстемеақыға онға жетпес маман ғана қол жеткізді. Алайда, алдағы жылдары компания жасанды интеллектпен сауатты жұмыс істейтін сертификатталған мамандар санын мыңға дейін жеткізуді көздеп отыр. Басшылықтың пікірінше, бұл басқа бөлімшелерде де нейрожеліні қолдануды тездетуге септігін тигізеді.

Қызметкерлерін жасанды интеллектті меңгергені үшін ынталандырып отырған жалғыз жапондық компания Honda емес. Мұндай бастамаларды елдегі All Nippon Airways әуе компаниясы мен Family Mart дүкендер желісі сияқты басқа да ірі жұмыс берушілер қолға алған. Toyota компаниясының да жасанды интеллектке қатысты өз жоспары бар: олар бизнес-процестерді оңтайландыру, атап айтқанда, құжаттамадағы терминологияны біріздендіру үшін ЖИ-ді белсенді түрде қолдануға ниетті.